-Almmuhus-
-Almmuhus-
OĐĐASAT Universitehtas njuolga bargoeallimii

Universitehtas njuolga bargoeallimii

-

-

Gávccis lohkásis ožžot barggu dakkaviđe go gárvejit oahpuset UiT Norgga árktalaš universitehtas. 

Dán jagi UiT Norgga árktalaš universitehta kandidáhtaguorahallamis vástidit 81 proseantta ahte ožžo barggu dakka maŋŋel go gárvejedje oahpuset. 

– Dáinna čevllohallat sakka go dat han čájeha ahte min studeanttat leat bivnnuhat sihke priváhta ja almmolaš bargosajiin, lohká rektor Anne Husebekk. 

Dušše 3 proseantta kandidáhtain vástidit ahte leat bargoozus. 12 proseantta dadjet ahte leat ain studeremin ja 3 proseantta vástidit ahte barget gaskkohagaid dahje leat guhkit áigái buohccindieđihuvvon.  

 

Duhtavačča

UiT studeanttat leat maiddái hirbmat duhtavaččat iežaset oahpuin ja oaivvildit ahte oahppu lea relevánta iežaset barggu ektui. 

– 86 proseantta ođđaoahppan UiT-kandidáhtain vástidit ahte sis lea relevánta dahje hui relevánta oahppu iežaset barggu ektui. Dainna leat hui duhtavaččat go dat duođašta ahte fállat dárbbašlaš oahpuid, dadjá Husebekk. 

Studeanttaid duhtavašvuohta lea bisson stáđisin dan rájes go universitehta čađahišgođii guorahallamiid 2010:s. 

- Advertisement -
-Almmuhus-