Nuorra guovdageaidnulaš báhčči ja várggátlaš taekwondohárjehalli oažžuba guktot Ulvangstipeandda mii lea 50 000 ruvnno, mainna beassaba viidáseappot mihttuid guvlui rahčat.
Soai leaba buoremusaid gaskkas sudno valáštallansuorggis olles riikkas, leaba riikkajoavkkus ja bargaba olahit ođđa mihttuid sihke riikkadásis ja riikkaidgaskasaččat.
Háliidivčče Olympiagilvvuide
Anne Beate Andersen Hætta válljejuvvui 2018:s leat mielde riikkajoavkkus leairaduvvábáhčimis. Son beasai maid searvat davviriikkalaš meašttirgilvvuide, gos fiškalii golli iežas luohkás, ja beasai gohčodišgoahtit iežas Davviriikkalaš meašttirin.
Dál lea son jurddašeame olahit ođđa mihttuid ja háliidivčče beassat searvat Olympiagilvvuide.
– Lean hui giitevaš go lean ožžon dán stipeandda. Dat lea hui mávssolaš munnje, ja movttiidahttá mu eanet olahit ođđa mihttuid faláštallamis. Stipeandaruhta veahkeha ođđa ávdnasiid oastit ja beasan mátkkoštit gilvvuide, lohká Anne Beate preassadieđáhusas maid.
Son lea Guovdageainnus eret ja ovddida Guovdageainnu bivdo- ja guolástussearvvi valáštallanbáhččijoavkku (Kautokeino Jeger- og Fiskerforenings sportskyttergruppe).
Maŋemus jagi go lea junior
Celine Christensen nagodii čáhppes boahkána taekwondo faláštallamis 2017:s, ja lea 2018 rájes ovddastan juniorriikkajoavkku. Dán giđa vuolgá son Duiskii ja searvá junior máilmmimeašttirgilvvuide, ja čakčat ges áiggošii gilvalit Eurohpámeašttirgilvvuin Bosnia-Hercegovinas.
Dál lea sus maŋemus jahki juniorjoavkkus, ovdal go vuolgá gilvalit senioraid searvái.
– Taekwondo ii leat dušše astoáiggedoaibma, muhto lea oassin mus. Mun nu liikon áiggi dasa golahit, ja áiggun bargat garrasit dan maŋemus jagi go lean junior, ja ovdal go šattan senior, danin ferten ge vel garraseappot hárjehallat, lohká Celine.
27 ohcci oktiibuot
Lea maŋemus jahki go juhkko Ulvangstipeanda. Ledje 27 ohcci ohcan geat ovddastit 14 iešguđetlágan faláštallama. Lávdegottis leat ovddasteaddjit Finnmárkku fylkkagielddas, Altapostenis ja Finnmárkku valáštallanguovllus.
Lávdegoddi válljii addit stipeandda dán guovtti niidii, geain lea taleanta ja leaba buoremusaid dásis sudno faláštallansuorggis, ja olaheaba buriid bohtosiid.
