Sámediggeráđđi lea juolludan 400 000 ru. prošektii Sámi dearvvašvuođabargojoavku. Prošeavtta ulbmil lea oččodit ovttaárvosaš dearvvasvuođabálvalusaid sámi álbmogii.
Lullisámi dearvvašvuođafierpmádat álggaha dál prošeavtta sámi dearvvašvuođabargojoavkku (samisk helseteam). Lullisámi dearvvašvuođafierpmádat lea fierpmádat mas leat lullisámi guovllu sámi dearvvasvuođabargit.
Fierpmádat ásahuvvui guovvamánus 2019:s, ja čađahii 2019 – 2020:s sámi dearvvašvuođabargojoavkku álgoprošeavtta. Lullisámi dearvvašvuođabargojoavkku/Åarjelsaemien healsoviermie váldomihttun lea oččodit ovttaárvosaš dearvvasvuođabálvalusaid sámi álbmogii máhttogaskkusteami, prošeaktabarggu, dutkama ja klinihkalaš barggu bokte.
– Sámi álbmoga dearvvašvuođabálvalusaid ferte nannosit organiseret, ovdal go olahit ovttaárvosaš bálvalusaid, dadjá sámediggeráđđi Hans Ole Eira (Gb) preassadieđáhusas.
Son lohká ahte dásseárvobarggu ferte doaimmahit máŋgga dásis, ja olu proseassat leat juo jođus.
– Sámediggeráđđi oaivvilda ahte prošeakta mii dál oažžu doarjaga, sáhttá leat buorren deavddan almmolaš bálvalusaide, dadjá Eira
– Fierpmádat attášii eanet máhtolašvuođa
Lullisámi dearvvašvuođabargojoavkkus leat dearvvašvuođabargit geain lea nanu bargohárjáneapmi dearvvašvuođasuorggis, ja geain lea gelbbolašvuohta lullisámi dearvvašvuođaáššiin.
– Sámi dearvvašvuođabargojoavkku prošeavtta oasseváldit leat sámi dearvvašvuođabargit geat barget iešguđetlágan ásahusain, muitala politihkalaš ráđđeaddi Maja Kristine Jåma.
– Fierpmádat attášii eanet máhtolašvuođa sámi dearvvašvuođa birra suohkaniin ja dearvvašvuođafitnodagain. Dat mii lea gelddolaš dáinna prošeavttain lea ahte eai bovde dušše suohkaniid ja dearvvašvuođafitnodagaid searvat, muhto maiddái Lulli-Sámi guovllu boazodoalloorohagaid. Dan bokte lea prošeavttas áibbas sierralágán dimenšuvdna, gos guovllu dearvvašvuođageavaheaddjit váldojit sierra ládje vuhtii, loahpaha Jåma preassadieđáhusas.
Ruhtadit
Sámi dearvvašvuođabargojoavkku ruhtadit Sámediggi, Helse Midt, Røros suohkan ja Lullisámi dearvvašvuođafierpmádat/Åarjelsaemien healsoeviermie fárrolaga.
Doarjja juolluduvvo doarjjaortnegis Doarjja dearvvašvuođa- ja sosiálaprošeavttaide, vuoruheamis Prošeavttat mat láhčet gielalaččat ja kultuvrralaččat heivehuvvon dearvvašvuođa- ja fuolahusbálvalusa.
