Porsáŋggu Bargiidbellodat massii fámu Olgešbellodahkii 2011:s, ja Bargiidbellodaga sátnejođiheaddjievttohas lohká iežaset bargat garrasit oažžut jienasteddjiid luohttámuša ruovttoluotta.
Porsáŋggu Bargiidbellodat massii fámu Olgešbellodahkii 2011:s, ja Bargiidbellodaga sátnejođiheaddjievttohas lohká iežaset bargat garrasit oažžut jienasteddjiid luohttámuša ruovttoluotta.
– Massiimet fámu smávva erohusain mannan válggas, dál lea min ulbmil oažžut fas fámu. Dan guvlui mii dál bargat, lohká Porsáŋggu Bargiidbellodaga sátnejođiheaddjievttohas Aina Borch.
Son lohká jienasteddjiid luohttámuša áigut oažžut buriin bálvalusain ja guhkitáigge ja ollislaš plánaiguin.
Bargiidbellodagas lei sátnejođiheaddji áigodagas 2007-2011, ja masse fámu Olgešbellodahkii mannan válggas.
Lohpádusat
Aina Borch lohká lea dehálaš ahte gielddas leat buorit skuvla- ja dearvvašvuođabálvalusat, ja sin dáhttu lea ođasmahttit ja álkidahttit gieldda bálvalusaid.
– Vuosttaš čuokkis lea njulget gieldda ekonomiija, muhto seammás doalahit fokusa fállat buriid bálvalusaid mánáide, nuoraide ja vuorasolbmuide ruđaiguin mat mis leat, lohká son.
Bargiidbellodat áigu maid vuoruhit bargosajiid, oččodit eambbosiid bissovaš virggiide.
– Lea dieđusge gáibidahtti oččodit bissovaš virggiid, muhto dat maid mielddisbuktá loaktima, oadjebasvuođa ja orrunmovtta. Dieđán muhtumat ieža háliidit gaskaboddosaš virggi, muhto gávdnojit maid sii geat háliidit bissovaš virggi, lohká son. Borch ii loga diehtit logu galle gaskaboddosaš virggi gielddas leat, muhto lohká sin áigut vuoruhit ahtanuššat gieldda potensiála.
Ekonomiija
Bargiidbellodaga sátnejođiheaddjievttohas lohká iežaset guktii ovdal njulgen gieldda ekonomiija, go Bargiidbellodagas leamašan fápmu.
– Leimmet aiddo čorgen gieldda ekonomiija ja beassan ROBEK:s eret go massiimet fámu mannan válggas. Dál lea gielda fas ROBEK:s, nu lea álgovuorus dehálaš njulget ekonomiija vai mii ieža sáhttit mearridit iežamet ruđa badjel, lohká son.
Borch cuiggoda dálá posišuvnna ja lohká sin badjelmeare ollu geavahan ruđa mii gielddas ii leat.
– Mii leat dorjon máŋga prošeavtta, ovdamearkka dihtti ođasmahttit skuvlla, muhto oaivvildan ahte go ii leat ruhta ođasmahttit visot, de ii berre dan bargat, muhto baicce dađis ođasmahttit go lea ráđđi, lohká son.
Porsáŋggu gielda lea golmmagielat gielda gos lea sáme-, kvena- ja dárogiella, Aina Borch lohká dehálažžan seailluhit sáme- ja kvenagiela ja -kultuvrra.
– Mii fertet láhčit dilli nu ahte mánát ja nuorat háliidit oahppat giela. Seammás fertet vuoruhit ahte mánát ja nuorat ožžot fálaldaga. Mii eat leat siskkáldasat digaštallan ollásit ášši, muhto ášši lea dehálaš, lohká son.
Ávjovárri
Porsáŋggu gielda lea dieđihan iežas eret Ávjovárri ovttasbarggus, ja Borch mielas lei dat beare hoahpus čoavddus.
– Mii fertet gulahallat ja ovttasbargat eará gielddaiguin, mis lea hállu fas gulahallat vejolašvuođa oččodit ovttasbarggu, lohká son.
Aina Borch deattuha dehálašvuođa gulahallat ja ovttasbargat eará gielddaiguin, mii lea dehálaš Porsáŋggu gildii.
Ášši almmuhuvvui vuosttaš geardde 16.04.2015
