Ukrainalaš joavkku Go_A dievddut leat ožžon ráđđehusas lobi vuolgit riikkaidgaskasaš čuojahanmátkái, ja de lea ge viimmat čielgan ahte bohtet čuojahit Riddu Riđu festiválas. Joavkku čielga ávžžuhus lea ovttas doarjut ukrainalaš kultureallima.
Ukrainalaš elektrofolk-čuojahanjoavku Go_A ovddastii Ukraina 2021 Eurovision Song Contest nammasaš lávlungilvvus Rotterdam gávpogis, ja sin lávlla «Shum» olahii loahppagilvvuin viđát saji.
Go_A ráhkada ođđaáigásaš dulkoma ukrainalaš folklore-kultuvrras masa gullet ollu elektrovnnalaš jienat. Čuojahanjoavkku namas leat sánit «Go», mii mearkkaša «lihkadeapmi» ja “A” ges vuolgá dološ greikalaš bustávas «alfa», mii symbolalaččat govvida kultuvrralaš ruohttasiid ja buot áššiid álggu.
Joavkku musihka guovddážis leat muitalusat, ja sii muitalit ge ođđasit árbevirolaš muitalusaid mat leat johtán sogas sohkii. Go_A lávlu Kateryna Pavlenko lea váldán atnui dološ nuorta-eurohpalaš folklore-vuogi jienainis, mas čotta lea áibbas rabas ja nu allat go fal vejolaš.
Illuda
Riddu Riđu festiválahoavda Sajje Solbakk vuorddaša iluin beassat oaidnit joavkku lávddis.
– Go_A joavkkus leat áibbas sierralágan jienat mat hohkahit olbmuid dánsut! Joavku ii atte gehččiide dušše erenomáš vásáhusa lávddis, muhto sii muitalit maid issoras soađi birra mii lea Ukrainas. Illudan go beasan guldalit Go_A joavkku deavdimin Riddu-guolbana dánsehahtti musihkain ja buoššivuođain, lohká Solbakk preassadieđáhusas.
Riddu Riđđu lágiduvvo Olmmáivákkis, Gáivuonas, suoidnemánu 12.-16. beaivái. Lihput leat oastinláhkái festivála neahttasiiddus.
Festivála lea ovdalaččas almmuhan dáid artisttaid ja kulturgaskkusteddjiid: Ana Tijoux, Rolffa, Frank Waln, Katarina Barruk, Lávre, Stand-up: Isalill Kolpus, Hildá Tuomas, Hva er det som spiser meg om natten, Small time giants, Manne ja 7 % samisk nammasaš čájálmas.
