Universitehta Romssas háliida heaittihit bivnnuhis masteroahpu logopediijas, seastin dihte ruđa. Seammás lea váili logopedain miehtá regiovnna.
– Lea áibbas dušši heaittihit dán oahpu, dadjá vuosttašamanueansa Signhild Skogdal, guhte lea UiT logopediija fágavásttolaš, Khrono:i.
Mannan sisaváldimis ledje 80 ohcci 15-20 sajiide masteroahpus. Seammás leaba guovttis, geat leaba aiddo gárven oahpu, álgime doavttirgrádain.
Olu guovlluin lea váili logopedain, erenoamážit Davvi-Norggas. Dál gávdnojit dušše guokte sámegielat logopeda olles riikkas. Afasiforeningen logopedaiskkadallamis čájehuvvo ahte 63 proseanta gielddain váilo logopeda rávisolbmuide.
Stivra Fakulteahtas humanioras, servvodatdiehtagis ja oahpaheaddjeoahpus (HSL-fakulteahta) váldet mearrádusa gaskavahkku. Loahpalaš mearrádus váldo universitehtastivrras.
– Lea váivves ášši go fertet árvalit heaittiheami, dadjá fakulteahta prodekána, Lars Aage Rotvold.
Son čilge ahte sivvan dasa lea ekonomalaš dilálašvuohta. (©NTB)