Kárášjoga beassášfestivála hoavda Kenneth Eliassen lei gal vuordán birrasii 100 olbmo, muhto eai boahtán eambbo go 25 olbmuide beassášfestivála rahpankonsertii.
Kárášjoga beassášfestivála hoavda Kenneth Eliassen lei gal vuordán birrasii 100 olbmo, muhto eai boahtán eambbo go 25 olbmuide beassášfestivála rahpankonsertii.
Lágideaddji Kárášjoga beassášfestivála rabai ikte beassášfestivála beannot tiibmosaš konsearttain. Kárášjoga nieida Aili Katrine Wergeland Teigmo rabai konseartta ja guoimmuhii olbmuid iežas lávlagiiguin meastta tiimmu. Sus leamaš, maŋŋá go almmuhii You Tube interneahtta báikkis iežas lávlagiid dá gieskat, ožžon hirbmat olu rámi miehtá máilmmi. Gaskavahkku lei son olahan 4 millijovnna guldaleddjiid.
Dušše 25 olbmo boahtán
Dađe bahábut eai lean go birrasii 25 olbmo boahtán dán beassášfestivála rahpankonsertii valáštallanvissui Niitoguolbanii Kárášjohkii.
– Mii leimmet gal vuordán uhcimus 100 olbmo, nu ahte mii gal behtohalaimet dál. Okta sivain sáhttá leat dat stuorra heajat mat odne ledje Kárášjogas odne. Muhto konsearta lei alla kvalitehta dási, sisabeassan lihpus lei govttolaš haddi ja lei suddu go eai boahtán eanet olbmot odne. Dáppe Kárášjogas lea olu mii dáhpáhuvvá ja lea stuorra gilvu olbmuid alde. Dan mii gal dohkkehat ja leat duđavaččat dáinna doaluin muđui, lohká Kárášjoga beassášfestivála festiválahoavda Kenneth Eliassen maŋŋá konseartta.
Guldaleaddjit lokte
Konsearta lei buot ahkásaččaide. Turista Kjetil Sparby lei boahtán nieiddainis konsertii ja nieiddat dánso viššalit sihke Aili Katrine Wergeland Teigmo ja Duolva Duoddara musihkii.
– Mis lei miella fitnat dán konsearttas, lohká Kjetil Sparby.
Celine Teller Sparby muitala son láve guldalit Aili musihka interneahtas go son liiko dasa. Erika Teller lea ovtta oaivilis oappáinis.
Elise Embla Scheele muitala Aili Katrine Wergeland Teigmo lea dál beaggán riikkaidgaskasaččat You Tube vehkiin ja olbmot leat su dál fuomášan.
– Duolva Duoddara joavkku musihkkii oahpásmuvven go orrun Guovdageainnus 2008:s ja lea somá oaidnit joavku lea ožžon come-back. Gánddat leat rávásmuvvan dan rájes, sii han ledje áibbas nuora go beakkihedje Norggas.
Elise Embla Scheele lea eret Mátta-Norggas, muhto ássá dál Kárášjogas. Lohká lea erenoamáš go ná smávva gielddas lágidit dákkáraš beassášdoaluid ja dat váikkuha maiddái olbmuid ássanmoktii.
– Buorre šovva ja čaffadis rumbbučuojaheaddji
Ávvir deaivá 19 jahkásaš Aili Katrine Wergeland Teigmo, su oappá Maina ja su skihpára Lemet A. Graven gii dán vuoru lea govven Aili viššalit. Nuorra artista muitala son bivdii su govvet su lávddi alde ja Graven lei nu šiega.
– Mun gal lean nu rámis ja mu oabbá lea hirpmástuhttán mu. Mu mielas lei áibbas buorre šovva ja čaffadis rumbbučuojaheaddji, Esben Thomassen ja Aili fásta DJ, ja Aili lei nu čeahppi, moddjá Maina.
(Ášši joatká gova vuolde)
CD vuordimis
– Mun lávlon veaháš maid, lei veaháš cover-lávlagat, iežan dahkon lávlagat ja mu maŋimuš lávlla «New horizon». Lávlon maid mu ođđa lávlagiid «Dánce with me» ja «Under the roof» maid mun farga almmuhan, lohká Aili Katrine Wergeland Teigmo.
Duolva Duottar šovva
Das maŋŋá guoimmuhii beakkán Guovdageainnu albmáid Duolva Duottarjoavku kárášjohkalaččaid šovvain nu mo lávejit.
(Ášši joatká gova vuolde)
Autográfačállin
Smávva nieiddažat Celine Teller Sparby ja Erika Teller leaigga áhčiin boahtán dán bearaš festivála. Nieidda guovttos dánssuiga eahketbotta ja lei buorre sadji láhtti alde. Maŋŋá go konsearta gearggai, de oaččuiga deaivat Duolva Duottar artisttaid Fred-René Øvergård Buljo, Ole Máhtte Hætta Gaup ja Ivan Andre Skum.
– Autográfačállin ii leat nu dábálaš šat go ovdal lávii, lohká Ivan Andre Skum.
Fred-René Øvergård Buljo muitala eai nu gallis šat jeara autográfaid dál, muhto go olbmot dahket dan, de lea sin mielas hirbmat somá.
– Lei vásáhus ahte ledje nu uhcán olbmot, ii nu imaš go nuppe beal luotta lea heajat. Mun jerren muhtin nieiddas mii su namma lei ja su namma lei Julie ja mun čuojahin konseartta su ovddas. Vaikke lea boahtán okta, vihtta dahje logi olbmo boahtán, mu čuojahan goitge sidjiide konseartta.
Igor prinsa
Duolva Duottarjoavku lei oaččui veahkki operalávlu Hege Sofie Nilsenis lávlut Igor prinssa lávlaga. Su jietna skájai čielgasit seinniid gaskkas. Hege Sofie Nilsen muitala son lea Čáhcesullos eret, muhto orru dál Álttás.
– Mun lean oahppan klassihkalaš lávlu. Deiven Duolva Duoddara go dárbbašii ođđa lávlaga ja mii leat ráhkadan ođđa veršuvnna Igor prinssas. Dál lávlon ja Niegu ja Duolva Duoddara lávlaga, lohká Hege Sofie Nilsen.
(Ášši joatká gova vuolde)
Fred-René Øvergård Buljo muitala Off-road Finnmark lei tiŋgon musihka ja dan oktavuođas ožžo sii oktavuođa operalávluin Hege Sofie Nilsen. Das maŋŋá leat lágideaddjit tiŋgon sin čuojahit.
– Mii leat Hege Sofiein dáid maŋimuš áiggi čuojahan konferánssain. Mii áigut ovdosguvlui seaguhišgoahtit eambbo opera min lávlagiidda. Dan dihtii leat mii bovden Hege deike. Šaddá luohti, opera ja rap, lohká Fred-René Øvergård Buljo.
Geahča video Aili Katrine Wergeland Teigmo konsearttas.
Video: Maina Wergeland
