Ođđa «Unna Junná» mánáid prográmmat oidnogohtet fargga.
Yle sámegielat mánáid TV-prográmma «Unna Junná» máhccá televišuvdnii ođđa prográmmaiguin vuossárgga guovvamánu 15. beaivvi rájes Yle TV2 -kanálas juohke vuossárgga diibmu 8.35 ja lassin Yle Areenas. Giđa vuosttas prográmmas oahpásmuvvat ođđa prográmmajođiheddjiin, Marianne Ketolain gii ássá Gárasavvonis ja stuđere journalistihka Sámi allaskuvllas Guovdageainnus. Boazobargguin son lea mielde álo go astá. Dat lea su vuosttas bargu TV-kámeraid ovddas.
– Dat lei hui suohtas, vaikko vehá orui gal vuos issoras, go nu olu leat čuovggat ja dakkárat, muhto dasa gal hárjánii jođánit, muitala Ketola YLE Sápmi preassadieđáhusas.
Anárašgillii prográmmaid láidesta Essi Morottaja ja nuortalašgillii Anna Lumikivi.
Prográmmaráhkadeapmi nuppástuvvá ja ovdána
Ođđa prográmmat leat šaddan Yle Sámi iežas studios, Anáris. Ođđa studio lassin dahkkit háliidit geahččalit ođđa vugiid govvet prográmma láidestuvvon osiid. Oassi dain govvejuvvojit maiddái olgun.
Prográmmajođihanosiid studios lea bagadallan prográmmabuvttadeaddji Heli Huovinen. Váldogovvejeaddjin lea doaibman Kevin John Francett ja nuppi kámera duohken leamašan «Unna Junná» aitosaš govvejeaddji ja čuohppi Anne Seipiharju. Ovddeš prográmmaláidesteaddji Nicholas Francett sirddii kámera duohkái báddet jienaid. Sámegielat mánáidprográmmain oahpes Irene Länsman lei dán háve govvenassisteantan.
Hitruus Ruu já skihpárat
Giđa vuosttas prográmmas beassat dalán oahpásmuvvat ođđa ráidui, mii muitala boazobeatnaga vielpáin. Prográmma namma lea «Hitruus Ruu já skihpárat». Vielpáid jietnan gullat ovdamearkka dihtii rap-artista Ailu Valle ja Yle Sámi doaimmaheaddji Sara Wesslin. Váldorolla, «Ruu», jietnaneavttárin lea Yle Sámi doaimmaheaddji Sáárá Seipiharju.
Ovttasbargu Sámi oahpahusguovddáža medialinnjáin joatkašuvvá, go studeanttat leat maiddái dán háve ráhkadan ođđa animašuvnnaid sámegillii.
Maiddái oahpes ráiddut, nu go «Kaazzi jieʹllem», «Hildá lodeh» ja «Dálvesuohttasat», oidnojit giđa «Unna Junná» prográmmain. Juohke mánotbaji álggus muhtun bivnnuhis ráidu almmustuvvá maiddái Yle Areenas Mánáide sámegillii -siiddus já Mánáid Areenas.
