Tv2 geahččit jienastedje Nils Erik Oskal čiekčamiid buoremus čiekčin.
TV2 sáddii odne čiekčamiid go Guovdageainnu ja Nordlys dievddut deaivvadedje Bákteváris. TV2 geahččit besse jienastit gean oaivvildit šilju buoremus čiekčin – ja gehččiid duopmu lei čielggas: Dat lea Guovdageainnu valáštallansearvvi Nils Erik Oskal.
– Dán in leat gal ovdal vásihan. Dihten gal ahte leat dahkan buori barggu šilju alde, muhto in doivon gal šaddat «Man of the Match»
– Dát gal lea stuorámus dáhpáhus mu spábbačiekčankarriearas. In leat goassege ovdal TV-čiekčamiin čiekčan ja vel šaddat šilju buoremussan. Dat lea jáhkkemeahttun, lohká movttegis Guovdageainnu čiekči Nils Erik Oskal maŋŋel čiekčamiid.
Nils Erik lohká otná čiekčamiid leamašan duođai garra čiekčamin:
– In jáhke eará čiekčamiid dán jagi šaddan na lossadin ja garasin, go visot min lunttat ožžo «krámppaid» julggiide. Álgen ieš maid dovdat ahte juolggit leat váiban, inge báljo nagodan šat njaccastit.