Golmmas leat váldon giddagassii Ruoŧas ja leat áššáiduhtton go galget ráhkkanan terrordaguid čađahit.
Dan dieđhit Ruoŧa áššáskuhttineiseválddit.
Dat golmmas leat váldon gitta maŋŋel politiijaakšuvnnaid máŋgga báikkis Davvi-Ruoŧas ja Stockholmma guovllus.
Máŋga eará leat dutkojuvvon, čállet Ruoŧa áššáskuhttineiseválddit preassadieđáhusas odne.
Guhkit áigge čuvvon mielde
Ruoŧa áššáskuhttineiseválddit muitalit ahte sihkarvuođapolitiija Säpo lea guhkit áigge čuvvon mielde dan golbmasa geat dál leat váldon giddagassii antiterrorbargguid oktavuođas. Expressen aviissa dieđuid mielde leat dat golmmas váldon gitta Akalla báikkis, mii lea unna báikkáš olggobealde Stockholma.
– Ráhkkaneamit dan várohuvvon vearredahkkui leat dáhpáhuvvan muhtun áiggi, muhto ii leat mihkkege mii čujuha dan guvlui ahte fálleheapmi lei plánejuvvon daid lagamus beivviid čađahuvvot, dieđihit áššáskuhttineiseválddit.
Terrordássi ii rievdda
Sihkarvuođapolitiijat dieđihit vel ahte terrordássi Ruoŧas bissu ain golmmežis skálas mas viđeš lea alimus lohku. Golmmeš mearkkaša ahte lea lassi áitta.
Internašunála čanastagat
Sihkarvuođapolitiijaid dieđuid mielde leat dan golbmasis geat leat váldon gitta internašunála čanastagat, muhto sii eai hálit vuos dadjat guđiid riikkaid birra leat sáhka.
Sihkarvuođapolitiijat eai muital leat go dán golbmasis geat leat váldon gitta čanastagat nubbi nubbái.
Sii muitalit ahte leat čađahan duoguštemiid.
(NTB-TT)
