-Almmuhus-
OĐĐASATTeam Nils Jøran njuovvan «Visa»

Team Nils Jøran njuovvan «Visa»

Journalista

-

-

Team Nils Jøran heargegilvvohallanjoavku lea dán čavčča šaddan njuovvat ovtta sin falimus hearggi, «Visa».

Team Nils Jørana gulahallanolmmoš Mikkel Andreas Eira muitala sii mearridedje njuovvat hearggi, go lei nu boaris šaddan.

– Visa lei juo njealját jagi nammaláhpan, ja iige gierdan šat ruohttat ja álo skierbmugođii maŋŋel.

 

Ii guovttádasten

«Visa» eaiggát leage Nils Jøran Eira, ja son válddii hui gulul dan mearrádussii ahte njuovvat hearggi.

– Nils Jøran logai ii leat mihkkege guovttálastet dainna ja moai leimme ge fárrolaga báhčime Visa, dáppe min geasseorohagas Gávvuonas Lákkonjárggas, muitala Mikkel Andreas Eira.

 

Lei ollu unnon

Sii gáldejedje «Visa» diibmá, ja leige unnon ollu dan rájes.

– Dat dettii goitge 92 kilo, mii lea oalle olu vaikke lei spáillit. Dalle go Visa lei sarvvis, jáhkán dalle livččii deaddán lagabui 120 kilo, go dat lei issoras deahkkás boazu.

 

– Dovdui go ruohtastii

Eira muitala Visa lei moadde jagi heargegilvvohallamiin falimusas searvvis, ja vuittii buot sprinttaid masa searvvai.

Eira muitala dat lei erenomáš heargi, ja lohká váttisin dadjat manne lei nu falli.

– Go min joavkovuoddji John Inge, gii lea oba ollu herggiiguin vuodján, vuosttaš geardde vujii Visain, de logai ahte falit herggiin ii leat vuodján goassige ja dovdui vel gieđaide go ruohtastii.

 

Gollediibmu

Eira lohká dain olahusain maid Visa bijai, de lea goit Gollediibmogilvu maid vuittii 2013:s, báhcán muitui. 

Gollediibmu-cup báhkkaluohká gilvvut leatge okta dain stuorámus heargevuodjingilvvuin mas falimus hearggit leat mielde.

–  Muđui lea Visas maid šilljorekorda Guovdageainnu heargegilvvohallan párkkas, 1.15.4 áiggiin, muitala Eira.

 

Eai asttan ráhkkanit
Eira ii loga vel asttan ráhkkanišgoahtit ođđa heargegilvvohallanáigodahkii, go sii galget lágidit njoarostangilvvu dás golmma vahku geahčen.

Sii eai leat vel bidjan dieđihanáigemeari dasa, muhto Eira muitala olusiid leat váldán oktavuođa ja čájehan beroštumi.

 

 

-Almmuhus-