Suming, Taiwanalaš supernástti guhte gullá Amis álgoálbmotjovkui Taiwanas, lea okta dain guhte ovddasta dán jagáš Davvi álbmoga Riddu Riđus dán gease.
Suming, Taiwanalaš supernástti guhte gullá Amis álgoálbmotjovkui Taiwanas, lea okta dain guhte ovddasta dán jagáš Davvi álbmoga Riddu Riđus dán gease.
Suming čálligođii iežas poplávlagiid 17-jahkásažžan, ja dan maŋŋil dan lea son ožžon olu bálkkašumiid iežas musihkkalaš taleantta ovddas ja iežas servodat berošteami ovddas. Geasset boahtá son Riddu Riđđui.
Taiwana álgoálbmogat Davvi álbmogin
Juohke jagi bidjá Riddu Riđđu erenoamáš fokusa muhtin álgoálbmotguvlui, eananspáppa davit oasis. Ovdal leat earret eará Six Nations-, Ainu ja Itelmen-dáiddárat bovdejuvvon ovdanbuktit iežaset dáidagaga ja kultuvrra festiválas.
Dán jagi leat álgoálbmotdáiddárat ja kulturguoddit Taiwanas geat galget čájehit oasáža iežaset kultuvrralaš máŋggabealátvuođas Riddu Riđđu gussiide.
– Mii hirbmasit illudat beassat čájehit muhtimiid dien máilmmeoasi stuorámus dáiddáriin ja álgoálbmotaktivisttain dán geasi festiválas. Máistaga, musihka, dáidaga ja bivdofilosofiija bokte čájehit sii min gussiide makkár árbevierut leat Paiwan, Amis, Atayal ja Puyumas, mat leat dat stuorámusat 16 álgoálbmotjoavkkus Taiwanas, lohká festiválajođiheaddji Karoline Trollvik.
Oahpa čuoldit
Riddu siiddas, festivála «minglenguovllus», sáhtát deaivvadit Yuma Taruin guhte gullá Atayal álbmogii, geat ásset váriin guovdo sullo.
Guovttelot jagi áigi guđii son stuorragávpoteallima ja máhcai fas ruovttubáikái, go fuomášii ahte Atayal-álbmoga gođđosárbevierut ledje jávkamin.
Preassagovva: Riddu Riđđu
Son čohkkii nissoniid ja sii manne de vuorrasat gođđiid oahppus, ja lea nie nagodan ealáskahttit gođđosárbevieru.
Dál oahpaha son dán giehtaduoji nuorat buolvvaide, skuvllas man jođiha ruovttubáikkistis.
– Atayal-gođđimis sulastahttá sámi gođđos- ja čuoldinárbevieruid, ja dán jagi sáhtát oahppat goappašat vugiid Riddu Siiddas, muitala Trollvik.
Ráhkada dáidaga moatti beaivvis
Arvvus adnojuvvon Paiwan dáiddár Sakuliu Pavavalungas šaddá maid guovddáš sadji dán jagáš festiválas. Son lea okta ovdavázziin Taiwana álgoálbmotlihkadusas.
Moatti hohppos festiválabeaivvis, galgá son ráhkadit áibbas erenoamáš installašuvnna, festiválaguossit besset čuovvut dán barggu.
Eará dehálaš jietna Taiwanas maid boahtá, nammalassii Sakinu Ahronglong, guhte jođiha álgoálbmotorganisašuvnna mii ovddida Paiwan kultuvrra bivdoárbevieruid. Sakinu oassálastá semináras mas lea sáhka bivdofilosofiijas.
Dán jagi Davvi álmogis lea sierra prográmmaoassi festiválas, lávvardaga suoidnemánu 16. beaivvi, gos guossit sáhttet oassálastit workshopain, máistit árbevirolaš biepmuid ja oahppat eanet dáiddáriin.
Ovdalaččas lea festivála jo almmuhan ahte Sondre Justad, Sofia Jannok, Hanggai, Ana Tijoux, Violet Road, Slincraze ja eará artisttat čuojahit dán geasi Riddu Riđus.
