Ođassiiddus lea govva guovddážis.
Odne, juovlamánu 1. beaivvi, rahppo ođđa sámi ođassiidu, mii galgá fállat čiekŋudeaddji áššáigullevaš journalistihka sámiide mas ealli govva lea guovddážis.
Visot guorahallamat čájehit ahte olbmot háliidit ođđasiid mátketelefovnnas. Ođđa siidu lea bures heivehuvvon mátketelefovnna vuogádahkii nu ahte olbmot sáhttet váldit oasi ođđasiin goas ja dalle go háliidit.
– Lea somá ja dehálaš sáhttit fállat iežamet gehččiide digitála ođasfálaldaga mas govva duođas oažžu saji. Doaimmahusa sávaldat lea ahte juohkehaš galgá beassat váldit oasi min ođđasiin, ii dušše ruoŧagillii, muhto maid buot sámegielaide. Dat mearkkaša ahte sámit ožžot vel stuorit public service -fálaldaga, dadjá SVT Sámi sadjásaš doaimmahushoavda Linda Hermansson preassadieđáhusas.
Ođđa sámi ođassiidu lea oassi SVT unnitlogugielaid vuoroheamis, mii siskkilda nannejuvvon ođasfálaldaga ja maid ahte almmuhit iežálágán prográmmaid.
SVT Sápmi, mii lea okta SVT doaimmahusain, ovddida ja čiekŋuda iežas fálaldaga sihke TV:s ja neahtas.
