Musihkkár, komponista ja neavttár Sverre Kjelsberg lea vádjolan eret. Son gávdnui jápmán iežas ruovttus Romssas, duođašta su bearaš.
Musihkkár, komponista ja neavttár Sverre Kjelsberg lea vádjolan eret. Son gávdnui jápmán iežas ruovttus Romssas, duođašta su bearaš.
– Dát dáhpáhuvai fáhkka ja lea šohkkan midjiide buohkaide. Mii leat čiekŋalis morrašis, lohká oabbá Elisabeth Kjelsberg NRK:i bearraša ovddas.
Sverre Kjelsberg lei eanemus dovddus «The Pussycats» joavkku bassistan ja lávlun, ja go oassálastti Eurovision Song Contest gilvvus 1980:s «Samiid Ædnan» lávlagiin fárrolaga Mattis Hættain.
Oahpásnuvaiga dollagáttis
Lávlla dagahii ahte Eurohpái gulastuvai sápmelaččaid vuosttaldeami birra, Álttá/Guovdageainnu dulvadanplánaid oktavuođas. Dasa lassin lea lávlla nammaduvvon Norgga buoremus Grand Prix lávllan.
Mattis Hætta muitala ahte deaivvadii Kjelsbergain vuosttaš geardde 1970-logu loahpageahčen, muhtin dollagáttis. Doppe vulggii luohti, ja moadde jagi maŋŋil vuittiiga MGP fárrolaga.
– Son lei čeahppi. Son máhtii čuojahit buot. Muhto deháleamos lei ahte lei áibbaš rehálaš, hui olmmošláđis ja hudju. Fertet muitit ahte son čuojahii Pussycatsas, mii lei okta Davviriikkaid stuorámus joavkkuin 1960-logus. Jurddaš son liekkadii lávddi Rolling Stones ovddas, lohká Hætta NRK:i.
Liggii lávddi Rolling Stones ovddas
The Pussycats karrieara, ovtta Norgga deháleamos joavkkuin 1960-logus, bisttii 1963:s gitta 1967 rádjái. Joavku almmuhii guokte albuma, «Psst! Psst!» ja «Mrr … Mrr …», mat guktot vuostái váldojedje bures sihke preassa ja guldaleddjiid bealis. Skearrut leat báhcán olahussan Norgga rockahistorjjás. Joavku ovttastuvvui máŋgii 80-logus.
The Pussycats joavkku rumbodearpi, Friedel Brandt, vuostái válddii maid jápmasága morrašiin.
– Sverre lei stuorra musihkkár, stuorra komponista ja bassista, ja hui smáđáhkes almmái, lohká Brandt Nordlysii.
Olles eallinagi barggai musihkain
Maŋŋil Pussycats áiggi logai Kjelsberg fágaoahpaheaddjisuorggis Davvi-Norgga Musihkkakonservatoriijas 1970:s gitta 75 rádjái, lávlun lei váldofágan ja kontrabássa ja piano ges oalgefágat. 1974:s gitta 1996 rádjái lei son musihkalaš jođiheaddji Hålogalándda teáhteris Romssas, gos komponerii ođđa musihka olu čájálmasaide.
Kjelsberg šattai maid dovddusin go lea bidjan šuoŋa ovtta Norgga eanemus dovddus ja árvvus adnojuvvon lávlagii «Ellinors Vise».
Sverre Kjelsberg guđii golbma rávis máná, dieđiha NTB.
