Svalbárdda áššeolmmái dieđiha ahte almmáiolmmoš lea jápmán maŋŋel go jiekŋaguovža fallehii su campingsajis olggobealde Longyearbyena mannan ija.
Jiekŋaguovža báhččui ja goddui. Almmáiolmmoš fallehuvvui campingsajis olggobealde Longyearbyena, muhto eai dieđe lei go son iežas tealttás vai fallehuvvui go lei olgun.
– Áššeolbmá politiijat ožžo dieđu diibmu 3.50 ahte jiekŋaguovža lea fallehan ja hávvádan muhtun olbmo campingsajis. Guovžža báhče sii geat ledje doppe, ja de manai girdišilju guvlui, mii lea lahkosis, dieđiha sadjásaš áššeolmmái Sølvi Elvedahl preassadieđáhusas.
Jámii sajis
Politiijajoavku sihkkarasttii saji. Longyearbyena buohcciviessu oaččui dieđu. Almmáiolbmo,gean fallehii jiekŋaguovža, duođaštii buohcciviesu doavttir jápmán.
Guhtta eará olbmo, geat ledje doppe go falleheapmi geavai, leat dolvojuvvon buohccivissui dearvvašvuođabargiid dikšui. Ii oktage sis leat fysalaččat hávváduvvon, muhto leat psykososiálalaš joavkku divššus.
– Mii eat vuos dieđe lea go makkárge gaskavuohta sis geaid dolvo buohccivissui ja oamehasas, dadjá Áššeolbmá kantuvrra gulahallanráđđeaddi Terje Carlsen.
Párkerensaji guvlui
Maŋŋel go báhče guovžža vuostá, de manai guovža Longyearbyena girdišilju párkerensadjái gos gávdnui jápmán.
– Mis leat leamaš moadde jiekŋaguovžža vánddardeamen nuppe bealde vuona maŋimuš beivviid, muhto in dieđe lea go okta dain mii fallehii, dadjá Carlsen.
Son dadjá ahte obbalaččat ávžžuhuvvo ahte olbmuin Svalbárddas leat vearjjut ja baldinluođat mielde go leat olggobealde sivilisašuvnna.
1971 rájes leat vihtta eará olbmo goddon jiekŋaguvžii Svalbárddas. Maŋimuš go dat geavai lei 2011:s go 17-jahkásaš brihttalaš skuvlaoahppi goddui go jiekŋaguovža fallehii tealtaleairra gos ledje máŋga oahppi. Golbma eará hávváduvvojedje ovdal go guovža báhččui.
