Sámi nieida Suvi West lea fas lávken ođđa TV-prográmmii. Dán giđa lea guoimmuheame dovddus Anna Perho humor-prográmmas Yles.
– Illudan hirbmadit dán bargui. Juo dalle go báddiimet dovdonuohta, lei mis nu suohtas. Lean álo liikon bargat Tv:s ja erenoamážit guoimmuhanprográmmain, dadjá Suvi West. Son leage ovdal bargan earret eará “Njuoska bittut” guoimmuhanprográmmas, mii čájehuvvui Suomas.
Okta njealljásis
Dál lea sámi nieida beassan lávket ođđa dássái Suoma TV- máilmmis, go lea jerron searvat Anna Perho ođđa tv-prográmmii fásta olmmožin.
West lea okta dan njealji nissonolbmos geat ságastallet ja leaikkastallet áigeguovdilis áššiin, sullii dakkár go “Nytt på nytt” lea NRK:s Norgga bealde. Prográmmma namma lea “Anna Perhon kyselytunti – väärät vastaukset viikon oikeisiin kysymyksiin”, sámegillii: Anna Perho gažadandiibmu – boasttu vástádusat rivttes gažaldagaide.
Dovddus nissonat
Dát humoristtalaš prográmma sáddejuvvo čieža gearddi dán giđa, ja earret Suvi, leat das fárus dovddus suoma dovddus nissonat Anna Perho, Olga Temonen ja Jenni Kokander. Ságastallamii searvá maid juohke vahku dovddus guossi, nugo politihkkár, doaimmaheaddji, girječálli dahje eará.
Árvalit feara maid
Ohcejohkalaš Suvi West orru dál Helssegis. Son lohká dán prográmmii fertet leat jođán hutkat suohttasiid.
– Ferte leat gearggus dadjalit, ja dieđusge ferte dego veháš máhttit suohtastallat ja árvalit feara maid. Dasa gal hárjána maid, go mađi eambbo nu bargá, dađi álkit dat šaddá. Šaddá dego jurddašanvuohki ja darvána juo dakkár hállanvuohki, muitala Suvi West Ávvirii.
Vuosttas prográmma čájehuvvo Yle TV2:žis duorastaga 23.4. diibmu 21. Prográmma buvttada Aito Media Oy.
