*/
Beroškeahttá 32 buolašgrádas 92 lujávrilačča bohte sihkkut suttuideaset lávgun gástajuolggis dahje jiekŋaráiggis Várremjogas, buressivdniduvvon čázis.
Mannan duorastat ija miehtá Ruoššas ávvudedje loahppášbeaivvi. Lujávrri olbmot ávvudedje dán girkobeaivvi logát jagi maŋŋálaga.
Maŋimuš áiggiid Ruoššas riikkaássiid gaskkas girkolaš ávvudeamit ja meanut leat šaddamin juo árbevirolaš ávvudáhpáhussan. Nu lea loahppášbeaivvi lávgunmeanut ge šaddan riikkalaš stuorra ávvudeapmin ja juohke jagi bohtet olbmot oassálastit lávgumii beroškeahttá guovllu temperatuvrras ja dálkkis.
Jiekŋaráiggi báldii leat ceggen lávu, gos olbmot besset molsut biktasiid ja liekkadit lávguma maŋŋá go lávus lea čuovga ja uvdna, leat biddjon čuovggat olggobeallái maid.
Sihkut suttuid ođđajagifeasttaid maŋŋá
Lujávrilaš Nikolai ii leat vuosttaš háve oassálastimin loahppášbeaivvi lávgunmeanuide, muhto ii muitte goasge leamaš seamma buolaš go dál.
– Ođđajagimánus mis láve leat dáppe buolaš, muhto ii fal 32 buolašgráda juste loahppášbeaivve, muitala Nikolai ja čaibmá:
– Muhto dat ii daga maidege go juste lávgunmeanus olmmoš beassá measta ođasmahttit iežas rupmaša ođđajagifeasttaid maŋŋá ja gullen ahte buressivdniduvvon čáhci sihku suttuid maid ja jus lea nie, de dat lea máilmmi buorre.
Čállán ja govven: Aleksander Paul ja Jevgenij Kirillov
