Anne Marie Therese Eira Kemi lea evttohan ahte Anton Dahl ánssášivččii juovlafuomášumi.
– Anton lea vuosttažettiin álo buoremielas ja oaidná buot olbmuid gos dal ain deaivvada suinna, čállá Eira Kemi iežas evttohusas ja joatká:
– Muhto buot eanemusat ánssaša rámi ja fuomášumi iežas eaktodáhtolaš doaimmaid ovddas. Son lea earret eará dálvvi, (measta) juohke cupačuoigamis Guovdageainnus, bidjame čuigiid johtui movttain ja ealljárvuođain, ja seamma movttain ja ealljárvuođain vuordime čuigiid moala luhtte.
Eira Kemi oaivvilda ahte dakkár olmmoš addá mánáide, nuoraide ja rávisolbmuide hui buori dovddu.
– Oba somá!
Ávvir fitná Antona luhtte, geigeme sutnje fuomášumi man son ánssáša.
Go eamit, Anne, gullá manne isit lea ožžon dakkár fuomášumi de lohká hui somán.
– Dát gal lei oba somá, ollu giitu! lohká Anton.
Anton lohká ahte sutnje lea áibbas lunddolaš dahkat buot dan maid bargá, iige lean máhttit jurddašit ge ahte sutnje galggašii geigejuvvot dákkár fuomášupmi dan dihte.
Vaikke Anton lea ealáhahkii lávken, de leat sus ain olu doaimmat ja barggut. Ja dákkár son lea álo leamaš, sus leat álo leamaš olu doaimmat ja olu barggut, ja lohká láittasin jus galggašii dušše ruovttus čohkkát beivviid.
Sutnje lea dehálaš čuovvut mánáid ja nuoraid čuoiganláhtus, ja sin movttiidahttit. Muhto lea hui giitevaš go Anne Marie Therese lea su evttohan, ja ahte sutnje geigejuvvui juovlafuomášupmi.
Guovttá ávvudit
Anton ii loga alddis olu plánaid juovllaide, muhto dán jagi leaba eamidiin guovttá ávvudeame.
– Mánát orrot iešguđet guovlluin, nu ahte moai letne guovttá de.
Muđui son áigu vuoiŋŋastit, návddašit, ja jus ii buolaš, de áigu fitnat Sáttomarrasa čuoiganláhtus maiddái.
