Nu dadjá Ávvira stivrajođiheaddji Arne Reginiussen NRK Sámi ođđa hoavdda Mona Solbakk, birra.
Nu dadjá Ávvira stivrajođiheaddji Arne Reginiussen NRK Sámi ođđa hoavdda Mona Solbakk, birra.
Odne almmuhii NRK ahte leat mearridan virgádit Mona Solbakk NRK Sámi ođđa hoavdan. Son váldá virggi badjelasas Nils Johan Heatta maŋis ja leage maiddái vuosttaš nissonolmmoš guhte jođihišgoahtá dán mediaásahusa.
– Áŋgir
Mona Solbakk lea ovdal bargan NRK Sámi 15 jagi, muhto dál lea Davvi álbmogiid guovddáža beaivválaš jođiheaddji. Dasa lassin lea son maid várrelahttu Áibmomediaráđis ja Ávvira stivrralahttu. Ávvira stivrra jođiha Arne Reginiussen, ja vaikke son deattuha ahte ii dovdda Solbakk nu bures, de lohká Solbakk leat áŋgiris olmmožin.
– Mun lean aitto jođihišgoahtán Ávvira stivrra, ii ge mis leat leamaš eará go okta stivrračoahkkin dan rájes go lean álgán. Danne in dovdda Mona Solbakk nu bures, muhto lean vásihan ahte orro hui áŋgiris olmmoš geas orrot dakkár attáldagat mat adnojit diekkár hoavdavirggis, dadjá Reginiussen.
– Guhká leamaš mielde
Reginiussen muitala maid ahte su mielas orro Solbakkas buorre máhttu sámeservodaga birra.
– Son lea maid guhká leamaš dán spealus mielde (mediaealáhusas jour. meark). NRK orro dahkan buori virgádeami, dadjá Reginiussen.
Stivra ii leat vuos mearridan
Stivrrajođiheaddji dattege ii loga vuos diehtit mo dát váikkuha stivrrabargui.
– Mun lean maid aittobáliid gullan dán virgádeami birra preassadieđáhusa bokte, nu eat leat ollen dán birra vuos nu olu ságastallat. Muhto stivra ferte deaivvadit ja árvvoštallat makkár mearkkašupmi Solbakka ođđa virggis lea su stivrarolla ektui. Mii fertet maid diehttelasat hállat Solbakkain gullan dihte maid son ieš oaivvilda, čilge Reginiussen, guhte sávvá ođđa NRK Sámi hovdii hui olu lihkku ođđa bargguin.
– Son nanne min barggu ja searvá nannet sámi giela ja kultuvrra, dadjá Eriksen NRK:ii.
Guođđá stivrra
Ieš Mona Solbakk lohká Ávvirii ahte lea hui ilus álgit hoavdan.
– Mus lea hui somás ja buorre dovdu, ja erenoamáš vuollegašvuođain beasan čuovvolit Nils Johan Heatta luottaid. Son lea hui buori barggu dahkan ja šaddá hui somá vuolgit Kárášjohkii bargui, lohká Solbakk.
Stivraámmáhiid dáfus ges gal lea čielggas maid dahká:
– Mun dieđusge in sáhte leat Ávvir stivrras go lean NRK Sámi hoavda. Nu lea hui lunddolaš ahte guođán stivrra ja ahte Sis-Finnmárkku investerensearvi vállje ođđa stivrralahttu mu sadjái. Maiddái Áibmomediaráđi várrelahttoámmáha guođán dál, dadjá Solbakk.
– Eará olmmoš go Heatta
Solbakk lea vuosttaš nissonolmmoš jođihit NRK Sámi, muhto ii dieđe mo dat váikkuha bargui.
– Munnje lea váttis dadjat dan. Lean nissonolmmoš ja muhtimat lohket ahte nissonolbmuin lea eará perspektiiva. Muhto dieđán ahte lean válljejuvvon virgái iežan máhttu ja vásáhusaid vuođul in ge danin go lean nisu. Liikká lean eará olmmoš go Nils Johan Heatta, ja danne leat maid erohusat, čilge son, iige loga diehtit mo boahtá vuhttot ahte NRK Sámis lea ođđa hoavda:
– Ferten vuos álgit ja oaidnit mo doppe lea dál, gávcci jagi leat vássán dan rájes go mun bargen NRK Sámis. Čakčat álget ođđa bušeahtta- ja strategiijabarggut ja dasa gal illudan.
Álginbeaivi ii leat vuos mearriduvvon, muhto Solbakk sávvá beassat álgit virgái nu jođánit go vejolaš.
– Muhto ferten vuos oaidnit man jođánit beasan eret dálá virggis Davvi álbmogiid guovddážis. Maŋimustá golggotmánu 1. beaivvi goittot lean jo álgán, čilge son ja lohká iežas fárremin Kárášjohkii.
– Hástalus bisuhit sámi gehččiid
Ja hástalusaid gal jáhkká ođđa hoavda leat vuordimis:
– NRK Sápmái leat máilmmi mediat stuorra gilvaleaddjin. Midjiide šaddá hástalussan oažžut sápmelaččaid geahččat ja guldalit min fálaldagaid, dadjá son ja joatká:
– Ovdamearkka dihte gávdnojit mánáide mánáid-TV fálaldagat vaikke man olu, de lea hástalus oažžut sámemánáid válljet geahččat sámi mánáid-TV. Seamma guoská maiddái daid eará fálaldagaide nu mo ođđasiidda ja nu ain.
Virgái ledje guđas ohcan: Sara Beate Eira (32) Guovdageainnus, Johan Ailo Kalstad (36) Guovdageainnus, Magne Ove Varsi (55) Deanus, Ole Christian Slyngstad (25) Holmestrandas. Dasa lassin lei maid 59-jahkásaš Thorbjørn Gaarder ohcan virgái.
Gaarder lea beaggán go lea geahččalan beassat Oslo politiijameašttirin, vearrodirektevran, preassagenerálan, finánsadirektevran ja dál ges NRK Sámi direktevran.
