-Almmuhus-
VALÁŠTALLAN– Surgat go gillejit bilidit

– Surgat go gillejit bilidit

-

-

Kárášjogas vudjet ja billistit skohtervuoddjit čuoiganláhttuid. Dát váivvida valáštallansearvvi mii geavaha olu ruđaid ja návccaid ráhkadit čuoiganláhttuid. Dál ávžžuhit politiijaid doallat bearráigeahčuid vai skohteršurra jaskkodivččii.

Oallugat čuiget Guorpmet badjel Kárášjogas, ja guvlui lea ge valáštallansearvi Nordlys ráhkadan čuoiganláhttu. Čuoigit vásihit dál ahte skohtervuoddjit vudjet láhttoráiggi ja billistit sin ovdii. Maiddái čuovgaláhttus Niittoguolbanis šuvihit skohterat duollet dállet čuoiganláhttoráiggi.

 – Lea vahát ja njulgestaga váivi go gillejit bilidit čuoiganláhttu. Doppe sáhttet gal čuoigat, muhto lea šállošahtti go mii bidjat olu ruđaid ja návccaid bargut doalahit čuoiganláhttuid, lohká Nordlys čuoiganjoavkku jođiheaddji Gunn Anita Skoglund Sara.

 

Unnit ruhta mánáide

Nordlys geavaha jahkásaččat máŋgalot duhát ruvnnu čuoiganláhttuid doallat rabasin, dasa lassin bidjá Kárášjoga gielda ruđa dán doibmii. Sii geat ráhkadit ja vudjet láhttuid valáštallansearvvi ovddas barget nuvttá ja geavahit olu friddjaáiggistis bargui.

 – Dál šaddat duppalit vuodjit ja golut maid duppalastojuvvojit. Dán geažil eat beasa ruđaid geavahit mánáid ja nuoraid doaimmaide, čilge Skoglund Sara.

 


Nordlys čuoiganjoavkku jođiheaddji Gunn Anita Skoglund Sara.
Vuorkágovva: Inga Marie Guttorm

Heajut fálaldat

Nordlys čuoiganláhttu jođiheaddji ii loga hearvádin ahte earát billistit dan maid sii ráhkadit, muhto dattege eai áiggo gal heaitit vuodjit čuoiganláhttuid.

 – Dearvvašvuođa doaibmabijut leat dán áigge hui dehálaččat olbmuide ja sii háliidit lihkadit. Dál giđa beallái lea hui fiinnis čuoigat ja das lea ávki moktii, muhto billisteapmi dagaha ahte kárášjohkalaččaide ja earáide lea heajut fálaldat čuoiganláhttus. Eat áiggo vuollánit gal, ja vuodjit láhttuid ain. Gielda oažžu fargga ođđa mášiinna ja dalle šattašedje čuoiganláhttut vel buorebut. Dál oidnojit čuoigit maiddái ávžžuheamen juohkehačča máksit láhttodivvaga. Juohke ruvnnus lea ávki ja dat dego geatnegahttá ja movttiidahttá min vel buoret barggu dahkat, lohká son.

 

Ávžžuha dárkkistit vuodjima

Skohtervuodjin čuoiganláhttus lea unnit eanet álohii leamaš váttisvuohtan, ja Nordlys čuoiganjoavkku jođiheaddji Gunn Anita Skoglund Sara jáhkká nuoraid skirvehit čuoiganláhttus.

 – Várra leat nuorat, in dieđe ležžet go oallugat geat ribahit vuodjit čuoiganláhttus. Ávžžuhan ahte váldet vuhtii čuoiganláhttu ja vudjet dan olggobealde jus áigot guovllus vuodjit. Dáppe galggašedje čađahit dárkkistemiid vai jaskkodivččii veahá, loahpaha Skoglund Sara.

 

Ii váttisvuohta bearráigeahččat

Kárášjoga leansmánnikantuvrras eai leat gullan ahte skohtervuodjimat billistit čuigiid ovddas, eai ge sii leat ožžon váidaga geas ge.

 – Jus mii oažžut cavgilemiid, de ii leat váttis čađahit bearráigeahččama. Jus skohtervuodjin dáhpáhuvvá eahkedis ja ihkku de lea veahá hástaleaddji, muhto dalle sáhttit dieđihit dán boazopolitiijaide geain leat veahá eará bargoáiggit go mis, lohká politiijabálvá Arvid Næss.

-Almmuhus-