-Almmuhus-
OĐĐASATSupersáŋgárat mearas

Supersáŋgárat mearas

-

-

Leat go imaštallan manne fatnasiin lávejit nu ártegis namat?

If Skadeforsikring-dáhkádusfitnodat ja Småbåtregisteret-smávvafanasregisttar leat ovttas ráhkadan listtu mas gávnnat makkár namat leat eanemusat biddjon Norgga fatnasiidda.

Listtu namma lea Båtnavnlista, dahje Fanasnammalistu, ja dasa leat registrerejuvvon 80 000 fanasnama.

 

Vulle Vuojaš ja su olbmát

Guhkesruoida, Mihkkal Sáhpán ja Anton leat beakkán Vuojášgávpotássit, ja sii leat ge beassan fanasgáibmin Norggas (sin dárogielnamat).

Biette, Biera ja Biehtár leat maid borjjasteame mearas, ja sin fárus lea earret eará Vulle Vuojaš, Silbon, Vuojaš-áhkku, Guffen ja Klodrik.

 

Mearasáŋgárat

Fatnasat leat maid govvaráidosáŋgáriid gáimmit, ovdamearkkat leat Lucky Luke, Spirit, Fantomet, Modesty Blaise, Asterix og Obelix.

Norgga govvaráiddu váldoolbmot Nemi ja Pondus leaba maid beassan fanasgáibmin Norggas.

– Govvaráidofiguvrrat ja sáŋgárat leat beakkán ja bivnnuhis fanasnamat, mat dávjá biddjojuvvojit namman norgga fatnasiidda, muitala If dáhkádusa gulahallanráđđeaddi Sigmund Clemetz.

Dát sáŋgárat leat juo čázis govddodeame ja leat gergosat vaikko masa: Fanaslisttus oidno ahte sihke Batman, Supermann, Arrow ja Flash vudjet Norgga njárggaid, sulluid ja gáttiid gaskkas.

 

Somás namat gádjot olbmuid

Juohke jagi álggahuvvojit máŋga ohcandoaimma dan dihte go guoros fatnasat govddodit mearas.

Jus fatnasis lea registrerennummir, de geahpeda váldogádjunguovddážiid, gádjunservviid ja politiijaid barggu go galget gávnnahit gii lea fatnasa eaiggát dahje eaiggáda lágášolmmoš, ja nu oažžut dieđuid mat álkidit ohcama ja nu sáhttet jođáneappot gádjut ja gávdnat láhppon olbmo dahje olbmuid. Maiddái erenoamáš fanasnamat sáhttet álkidit gádjundoaimmaid.

­– Lea hui buorre go fatnasiin leat erenoamáš namat, ja dakkár namat maid lea hui álki muitit. Dat álkida barggu jus galgá gávdnat fanaseaiggáda jus fanas dieđihuvvo Smávvafanasregistarii. Lea ge hui dehálaš dieđihit jus gávdná guoros fatnasa govddodeame mearas dahje jávrris dahje gos nu ain, muitala Clemetz.

 

Finnmárkkus

Finnmárkkus gal eai leat vel bearehaga geavahišgoahtán Disney-namaid.

Dáppe leat beakkáneamos fanasnamat: Vadsø, Nesseby, Amalie, Astrid ja Blåmann.

-Almmuhus-