Dát jahki sáhttá šaddat vearrámus gárrendilevuodjinjahkin 2002 rájes.
Dán vahkku lea ROADPOL Safety days, mii lea Norgga politiijaid ja Eurohpá politiijaid ovtatsbargu. Ulbmil lea ovttasbargat vai oažžut dorvvolaš luottaid ja eastadit ahte oktage duššá johtolagas, dieđiha johtolatsearvi MA – Rusfri Trafikk preassadieđáhusas.
MA – Rusfri Trafikk generálačálli Elisabeth Fjellvang Kristoffersen ja geaidnopolitiijaid jođiheaddji Steven Hasseldal bivdiiba johtaleddjiid jurdilit iežaset láhttenvuogi vai oažžut duššanloguid niedjat johtolagas. Soai leaba suorganan dán jagi gárrendillevuodjima ja allaleathtovuodjima dihte.
– 2018 rájes leat 60 olbmo duššan johtolagas gárrendillevuodjima dihte. Gárrendillevuodjin lea nu dábálaš ahte 6470 olbmo leat váidon dán rádjái dán jagi. Dat vástida 27 váidojuvvon biilavuoddji juohke áidna beaivvi, dadjá Kristoffersen. Logut eai hirpmástuhte Kristoffersena, gii baicce jáhkká duohta loguid ollu vearrábun.
21 vuoddji juohke beaivvi
Čakčamánu 15. beaivvi ledje 5394 olbmo massán vuodjinlobi go vudje badjel leahttoráji. Preassadieđáhusas čállá MA Rusfri Trafikk ahte leahttu ja gárrendilli dávjá gullet oktii. Sii geat vudjet gárrendilis vudjet dávjá beare leahtuin ja boahkána haga. Alla leahttu mielváikkuha ahte jápminlihkohisvuođat dáhpáhuvvet.
– 108 olbmo dušše johtolagas 2019:s. 40 proseantta dain fátmmastii alla leahtu, ja gárrendili 20 proseantta. Gaskamearálaččat 21 vuodjinlobi váldojuvvojit eret juohke beaivvi. Olbmot eai oro ipmirdeame man bahá dat lea vuodjit beare leahtuin, dadjá Hasseldal.
Seavdnjat
Hasseldal jáhkká 2020 šaddat sevdnjes jahkin. Diibmá masse 5719 olbmo vuodjinlobi, ja 2018:s 5543.
– Dál lea dušše čakčamánnu ja leat juo badjel 5000 geat leat massán vuodjinlobi. Min deháleamos diehtu johtaleddjiide lea doalahit leahttorájiid, ii vuodjit gárrendilis ja čájehit áicilvuođa johtolagas, ávžžuha Hasseldal loahpalaččat preassadieđáhusas.
