Gávpeolbmot Suoma bealde ráji vurdet ahte Norggas buorránivččii ruhtadilli dál go jaskes áiggit leat Suoma rámbuvrrain gos norgalaččat dábálaččat viššalit gávppašit.
Gávpeolbmot Suoma bealde ráji vurdet ahte Norggas buorránivččii ruhtadilli dál go jaskes áiggit leat Suoma rámbuvrrain gos norgalaččat dábálaččat viššalit gávppašit.
Njuorggáma gávpeolbmot vurdet oljju máilmmimárkanhatti loktaneami, go de Norgga ruvdnu maid givrrošii. Rádjagávppiin Suoma bealde lea leamaš jaskadis čakča. Olles jagi 2015 vuovdin lea bisson sullii diimmá dásis dahje binná geahppánan, čállá Yle Sápmi.
– Gávppašeapmi lea gehppon árvvu mielde mottiin proseanttain jagis, dadjá gávpeolmmái Arto Aurala Ohcejoga Njuorggámis Yle Sápmái.
Njuorggáma gávpeolbmuid mielas Norgga bealde bohtet oastit eandalii bierggu, duhpáha ja vuola sihke eará alkohola.
Euro šaddan gievrrat
Euro váikkuha Norgga ja Suoma rádjegávppašeapmái.
– Várra stuorámus sivva gávppašeami jaskkodeapmái lea Norgga ruvnnu heajos gursa. Go gursa ovddit jagi lei vel sullii 8,50 lea dál euro vuostá 9,50 ruvnnu, dadjá Arto Aurala.
Njuorggáma gávpeolbmot vurde juovllaid eanet gávppašeddjiid, muhto ruvnno gursa váikkuhii. Rájá guovtti bealde lea maid garra gilvu.
– Muhtin gálvvut leat Norgga bealde hálbbibut go Suoma bealde, dadjá Inger Länsman guhte vuovdá bohccobierggu ja eará báikkálaš buktagiid Njuorggámis, ja son oaivvilda ahte rádjagávpi galggašii doaibmat goabbat guvlui.
Čuovvu dárkilit oljju máilmmimárkanhatti
Arto Aurala sávvá oljju divrut ođđa jagis ja dan mielde ruvnnu gurssa buorráneami.
– Mađi divrasut olju, dađi buoret ruvnnu gursa, dadjá Arto Aurala Yle Sápmái.
Boaldámuš biilii, nu go diesellihtter, lea dál sullii beannot ruvnnu hálbbit ja bensiidna moaddelot evrre hálbbit Suomas go Norggas.
