Suoma presideanta Sauli Niinistö ja stáhtaministtar Sanna Marin oaivvildeaba ahte Suopma berre ohcat NATO- miellahttuvuođa farggamusat.
Suoma presideanta Sauli Niinistö ja stáhtaministtar Sanna Marin (SDB) oaivvildeaba ahte Suopma berre searvat Nato ovttasbargui. Soai čálliba duorastatiđit preassadieđáhusas ahte Suopma galgá jođáneamos lági mielde ohcat miellahttuvuođa Natoi, dan dieđiha YLE Sápmi.
– Moai sávve ahte álbmotlaš lávkkit, maid dát čoavddus eaktuda, váldojuvvojit lagaš beivviid jođánepmosit.
Presideantta ja stáhtaministara oainnu mielde nannešii NATO-miellahttuvuohta dorvvolašvuođa Suomas. Suoma riikabeaivi galgá formálalaččat dohkkehit dán ohcama.
Ruoŧŧa maid pláne ohcat
Ruoŧas dieđiha Expressen ahte Ruoŧa ráđđehus galgá vuossárgga, miessemánu 16.beaivvi, mearridit galgá go Ruoŧŧa sáddet ohcamuša beassat NATO-miellahttun, jus dáhttot dan, de galgá Ruoŧŧa dakka maŋŋá čoahkkima sáddet sin ohcamuša Natoi.
Ovdal go Suopma ja Ruoŧŧa oažžuba Nato-miellahttuvuođa, de fertejit buot 30 miellahtto-riikka dohkkehit dan guovtti riikka ohcamušaid.
Sihkarvuođašiehtadus Storbritanniain
Storbritannia stáhtaministtár Boris Johnson galledii gaskavahku Ruoŧa ja Suoma, ja dagai sihkarvuođašiehtadusa dan guovtti riikkain. Jus okta dáin riikkain fallehuvvo de boahtá dat nubbi veahkehit, maiddái militearalaččat čállá NTB.
