Oaivvilda ahte áidna vuohki loahpahit olmmošvuoigatvuođaid loavkidemiid, lea ođasmahttit sámediggelága.
– Stáhtaráđđi lea mearridan odne, duorastaga, loktet sámediggeláhkaevttohusa Riikabeaivái. Áššis jienastedje, ja 11 ministara dorjo evttohusa loktema Riikabeaivái, golbma Guovddášbellodaga ministara vuosttaldedje, lohká Henriksson Yle Sápmái.
Henriksson dadjá, ahte áidna vuohki loahpahit olmmošvuoigatvuođaid loavkidemiid, lea ođasmahttit sámediggelága.
– Lea váidalahtti go ráđđehusa mearrádus ii lean ovttajienalaš. Áigi lea goit dál nohkan ja dán dehálaš láhkaevttohusa ferte dál doalvut ovddos guvlui, oaivvilda Henriksson.
Giitá
Sámediggelága leat geahččalan ođasmahttit golmma maŋŋálas ráđđehusbaji áigge, muhto ovddit guokte geahččaleami leat eahpelihkostuvvan. Lea gávnnahuvvon, ahte Suoma stáhta lea dálá sámediggelága buohta jeavddalaččat rihkkon riikkaidgaskasaš olmmošvuoigatvuođasoahpamušaid ovdamearkan sámiid iešmearridanvuoigatvuođa ektui.
– Giittán buohkaid oktasašbarggus, geat leat ovddidan ášši, erenomážit oaiveministtar Marin ja vuoigatvuođaministtar Henriksson, geat leaba iežaska ovdamearkkain ovddideamen sámiid olmmošvuoigatvuođaid, čállá Suoma Sámedikki ságadoalli Tuomas Aslak Juuso preassadiáđáhusas.
Sámedikki stivra válmmaštallá ášši dievasčoahkkima gieđahallama várás jođánis áigetávvaliin. Dievasčoahkkin mearrida Sámedikki virggálaš oainnus guoskkadin láhkaevttohusa. Láhkii evttohuvvon nuppástusat ráđđehusa evttohusas eaktudit Sámedikki dohkkeheami.
