Suoma Sámediggi lea mannan vahkus almmuhan neahttasiiddu gosa leat čohkken sámi giellalága rávvagiid. Ulbmil lea álkidahttit barggu Suoma eiseválddiide, čállá Suoma Sámediggi preassadieđáhusas.
Sámedikki gielladorvočálli Anne Kirste Aikio čilge ahte Sámediggi háliida bovdet iešguđet eiseválddiid oahpásmuvvat siidduide.
– Dálášdieđuid mielde sámiid gielalaš vuoigatvuođat ollašuvvet hejot. Okta sivva dasa lea earret eará eiseválddiid diehtemeahttunvuohta dahje beroškeahtes doaladupmi sámi giellalága guovdu. Ođđa siidduid ulbmil lea addit eiseválddiide áigeguovdilis dieđuid sámiid gielalaš vuoigatvuođain, ja doarjut sin gielalaš vuoigatvuođaid vuhtii váldimis praktihkalaš barggus rávvagiid ja cavgilemiid bokte. Siiddut heivejit bures ovdamearkka dihte ođđa bargiid oahpisteapmái dahje skuvlenbeivviide, muitala gielladorvočálli Anne Kirste Aikio preassadieđáhusas.
Siidduin leat dieđut sámiid gielalaš vuoigatvuođain ja rávvagat mot heivehit sámi giellalága. Siiddut leat oaivvilduvvon doarjut buohkaid, geat barget sámegielat bálvalusaid olis. Mihttomearri lea, ahte juohke eiseváldi, geasa sámi giellaláhka guoská, dovdá ja ipmirda sámiid gielalaš vuoigatvuođaid.
Neahttasiiddut almmustahttojuvvojit dušše suomagillii. Muhto Suoma sámediggi lea maiddái válbmeme sámeálbmogii dieđihanmateriála gielalaš vuoigatvuođaid birra neahttasiidui sámegillii.
