Guovddáš oassi iešmearrideamis lea ahte álbmot ieš beassá mearridit geat gullet álbmogii, oaivvilda SPR.
Guovddáš oassi iešmearrideamis lea ahte álbmot ieš beassá mearridit geat gullet álbmogii, oaivvilda SPR.
Sámi Parlamentáralaš Ráđđi (SPR) fuolastuvvá go Suoma alimus hálddahusriekti čakčamánu 30. beaivvi hilggui suoma Sámedikki iežas mearrádusa ja dohkkehii 93 olbmo válgalogahallamii.
– Lea vuđolaš oassi iešmearrideamis ahte álbmot ieš beassá mearridit geat gullet sin jovkui. Alimus hálddahusrievtti mearrádus čájeha ahte Sámediggeláhka njuolggadusat rihkkot guovddáš iešmearridanvuoigatvuođaid, čállá SPR preassadieđáhusastis.
SPR oaivvilda láhkanjuolggadusaid rihkkut ICCPR (Riikkaidgaskasaš soahpamuš siviila ja politihkalaš vuoigatvuođaid birra) artihkkal 1 ja 27 ja UNDRIP (ON julggaštus álgoálbmotvuoigatvuođaid birra) artihkkaliid 3, 4 ja 5.
Suoma sámediggelága mielde ferte olmmoš ieš oaidnit iežas sápmelažžan ovdal go sáhttá lasihuvvot válgalogahallamii. Ohcci ferte maid deavdit objektiivvalaš eavttuid mat leat Sámelágas.
– SPR oaidná ahte suomabeale Sámediggi lea hástalan dálá eavttuid, ja ahte eavttuin ii leat legitimitehta suomabeale sápmelaččaid gaskkas, čállá SPR.
Sii dorjot Sámedikki vuoigatvuođa ahte ieš mearridit daid objektiivvalaš eavttuid vai beassá válgalogahallamii, ja gohčču Suoma vuhtiiváldit iešmearridanvuoigatvuođa.
Dákkárat leat dálá eavttut Sámediggelágas:
«Sápmelaš lea son guhte atná iežas sápmelažžan ja:
1) Ahte son dahje unnimusat okta su váhnemiin dahje ádjáin/áhkuin hálddašedje sámegiela vuosttašgiellan.
2) Ahte son lea dakkár olbmot maŋisboahtti guhte lea registrerejuvvon eana-, vearro- dahje olmmošlogus meahcce-, vuovde- dahje bivdisápmelažžan, dahje:
3) Ahte unnimusat okta su váhnemiin lea dahje livččii sáhttán leat registrerejuvvon válgalogahallamii.»
SPR vásiha ahte suomabeale Sámediggi ii dáhto geavahit nuppi eavttu, go das lea kontroversiealla duogáš, ja Sámediggi lea gáibidan dan rájes go vuođđuduvvui, ahte válgalogahallaneavttut galggašedje ollásit leat dušše giela vuođul, nu mo Norggas ja Ruoŧas leat.
– Sámit lea okta álbmot, ja mii garrasit ávžžuhat Suoma, Ruoŧa ja Norgga ovttasbargat sámedikkiiguin hábmen dihtii seammalágan válgalogahallaneavttuid buot golmma sámedikki várás, čállá SPR
