Sámiid duohtavuođa- ja soabahankommišuvnna lahttun dahje komissáran bohte áigemeari sisa oktiibuot 18 evttohusa, 14 Sámediggái ja guokte Nuortalaččaid siidačoahkkimii.
Suoma beale Sámediggi dieđiha ahte evttohuvvon olbmuid lohku lea oktiibuot logi preassadieđáhusas. Sámediggi ja Nuortalaččaid siidačoahkkin bivde evttohusaid kommišuvnna lahttun miessemánu 17. beaivvi rádjái. Áiggi jotke spiehkastatdili dihte. Sámediggi áigu lágidit gullamiid evttohuvvon komissáraid válljejumis ovdal go mearridit. Kommišuvnnas galget leat lahtut, geain lea erenomáš máhttu sámiid dilis, gielas ja kultuvrras.
Duohtavuođa- ja soabahanproseassa ulbmilin lea dovdát ja árvvoštallat historjjálaš ja dáláš vealaheami, masa gullet maiddái stáhta assimilerenpolitihkka ja vuoigatvuođaid loavkideamit. Dás galget maid iskat mo dat lea váikkuhan sápmelaččaide ja sin servošii dálá dilis ja evttohit mo sáhtášedje ovddidit oktavuođa.
Sámediggái evttohuvvon olbmot: Heikki Hyvärinen, Juha Joona, Marjaana Aikio, Aslak A Pieski, Petteri Länsman, Irja Jefremoff, Nils-Henrik Valkeapää, Miina Seurujärvi, Yrjö Musta ja Irja Seurujärvi-Kari
Nuortalaččaid siidačoahkkimii evttohuvvon olbmot: Irja Jefremoff.
