Pirita Näkkäläjärvi muittuhii goittotge, ahte Suoma beale Sámedikki legitimitehta ovdii galgá bargat.
Arctic Frontiers -konferánsa lágiduvvui dán vahkus Romssas. Konferánsa lea árktalaš doaibmiid stuorra jahkásaš deaivvadanbáiki.
Maŋŋebárgga Suoma stáhtaráđi kansliija lágidii konferánssas siidodáhpáhusa, man fáddán lei Suoma árktalaš strategiija. Árktalaš ráđđádallangotti várrelahttu ja Sámedikki áirras Pirita Näkkäläjärvi Anáris lei mielde panelas. Son rámidii Suoma árktalaš strategiija das, ahte dan bokte Suoma stáhta lea čatnašuvvan dasa, ahte eamiálbmot sámit galget leat mielde árktalaš ovttasbarggus ja ollašuhttimin árktalaš strategiija doaibmabijuid.
Pirita Näkkäläjärvi muittuhii goittotge, ahte Suoma beale Sámedikki legitimitehta ovdii galgá bargat.
– Jos sámediggeláhka ii ođasmahttojuvvo, ja Sámediggái luitojuvvojit ain eanet olggobeale olbmot, nu man guhká sáhttá dadjat, ahte Suoma Sámedikkis lea legitimitehta ovddastit Suoma beale sámiid maiddái árktalaš arenain, Näkkäläjärvi jearai. Nu čállá Pirita Näkkäläjärvi ieš preassadieđáhusas.
Näkkäläjärvi lohká dadjan doppe ahte Suopma lea čuvgejuvvon riika ja háliida sihkkarit, ahte sámiin lea boahtteáiggisge virggálaš ovddasteaddji Suoma politihkalaš ortnegis, mii hállá sámiid jienain.
Eará panelisttat ledje stáhtačálli Henrik Haapajärvi, Lappi gávpekámmára beaivválaš jođiheaddji Liisa Ansala, Suoma WWF váldočálli Liisa Rohweder, árktalaš ambassadevra Petteri Vuorimäki, Árktalaš guovddáža jođiheaddji Johanna Ikävalko ja USA árktalaš dutkankommišuvnna jođiheaddji Mike Sfraga. Arctic Frontiers -konferánsa lei Romssas duorastaga rádjai.
