Nationála čalmmusteamit suoidnemánu 22. beaivvi várás čađahuvvojit ráđđehuskvartála, Oslo duopmogirkus ja Utøyas.
Nationála muitobáiki suoidnemánu 22. beaivvi várás galgá ásahuvvot Utøyakáijai, nannáneatnamis feargaruggu buohta Hole gielddas. Muitobáikki ásaheapmi álggii jagis 2020, ja lea dál geargan. Dat šaddá čáppa ja árvvolaš báiki sidjiide geat cevze, maŋisbáhcciide, eaktodáhtolaččaide, veahkkeveagaide, dálá ja boahttevaš buolvvaide.
Gielda- ja ođasmahttindepartemeanta lea digaštallan Doarjunjoavkkuin maŋŋel suoidnemánu 22. beaivvi ja AUF:in, ja leat mearridan ahte ii šatta almmolaš rahpan muitobáikkis. Dasa leat guokte siva. Okta lea dan dihte go pandemiija gáržžida gallis sáhttet čoahkkanit ođđa muitobáikái, mii sáhttá dagahit ahte oapmahaččat ja maŋisbáhccit eai beasa searvat rahpamii. Nubbi sivva lea fas go guovlu lea ain huksenbáiki, earret eará go galgá huksejuvvot ođđa geaidnu káija lusa.
Prográmma nationála čalmmusteamis álggii diibmu 9 ja bisttii 9.45 rádjai, Ráđđehuskvartálas. Doppe sárdnidii earret eará stáhtaministtar, Erna Solberg, ja AUF-jođiheaddji Astrid W. E. Hoem. Doppe maid lohke namaid daid 77 olbmuin geat dušše. Muđui ledje eará sártnit, musihkkaguoimmuheamit, diktalohkan ja minuhtasaš jaskesvuohta.
Diibmu 11-12 lea čalmmusteapmi Oslo duopmogirkus. Doppe lea ipmilbálvalus.
Diibmu 13-14 lea Hole girkus ipmilbálvalus.
Diibmu 15-16 lea Utøyas fas čalmmusteapmi. Dasa searva Kruvdnaprinsa Haakon ja galgá sárdnidit.
Diibmu 19 čudjet Oslo ráđđeviesu biellut 77 geardde ja čuojaha «Til ungdommen».
Olles prográmma gávdno Ráđđehusa neahttasiiddus.
