Odne lea suoidnemánu 22. beaivve 11 jagi čalmmustahttin.
Odne, bearjadaga, lea 11 jagi áigi go Norga vásihii daid vearrámus terrordáhpáhusaid nuppi máilmme soađi rájes – bombafalleheami ráđđehuskvartálas, báhčimiid ja goddimiid Utøyas.
Suoidnemánu 22. beaivve-doarjjajoavkku nubbijođiheaddji, Tor Inge Kristoffersenis, lei vuosttaš sáhkavuorru. Son namuhii sihke Johanne Ihle-Hansena báhčima ja goddima, mii dán jagi dáhpáhuvai geassemánu 25. beaivve, ja falleheami Al-Noor-moskeas, mii dáhpáhuvai borgemánu 10. beaivve 2019:s.
– Golbma dáhtona 11 jagis leat golbma beare olu, mii eat galgga dárbbašit eambbo dáhtoniid muitit, logai son.
– Buohkain lea ovddasvástádus vástidit, ja vuosttildit, jus muhtin hupmá ja čájeha vaši. Mii fertet buohkat fuolahit ahte buot maid terrorista válddii mis, dahká min gievrrabun go goassege ovdal, jotkkii son.
Unnit guoskkahusballu go ovdal
Našuvnnalaš doarjjajoavkku jođiheaddji, Lisbeth Røyneland, oaivvilda ahte veahá dan balus suoidnemánu 22. beaivve oktavuođas, lea jávkangoahtán.
– Diibmá go čužžon dás jerren mun: «Maid livčče sii, geat eai leat šat, jurddašan min birra odne?». Mun jáhkán sii livčče dovdan rámisvuođa go veahá dan guoskkahusbalus lea jávkan. Mii leat givron vaši ektui. Mun vásihan eanet go ovdal, ahte mii máhttit lohkat mii lea mii. Seammás jáhkán ahte moraš devdogoahtá din váimmuide diehtit ahte leat áin olusat geain lea bávččas, logai son.
77 stoalppu
Maŋŋel olu vuostálastima, rahppui geassemánus nationálalaš muitobázzi Utøya-káijas.
– Dán jagi oaččuimet viimmat nationálalaš muitobácci. Utøya-káijas čužžot 77 stoalppu almmi guvlui seammas go speadjalastojit čázi vuostá. Nu mii muittašit sin geaid eat vajálduhte, ja jurddašit geat sii livčče leamašan odne, jus livčče beassan eallit.
– Odne lea 11 jagi áigi go ilgadis terrordáhpáhus geavai suoidnemánu 22. beaivve 2011:s. 4.019 beaivvi leat leamaš guoros stuolut borranbevddiid birra. Dá lea beaivi muittašit sin geaid eat vajálduhte, muhto maid muittuhussan ahte demokratiija ii boađe ieš.
Musihkkaguoimmuheapmi ja lieđđebidján
Daniela Reyes ovdanbuvttii «Ballongvisa», man su eadni, Maj Britt Andersen, lea čállán. Galget maid nammalohkamat ja lieđđebidjámat muitobáccis Høyblokkas.
Diibmu logis guđa rádjái, lea Oslo duopmogirku rabas, gos sihke gintaliid cahkkehit ja musihkka ovdanbuktojuvvo. Girkus leat báhpat ja diakona olles beaivvi.
Utøya čalmmustahttin álgá diibmu njealjis.
(©NTB)
