Arnt Pettersen vuittii váldogilvvus Unjárggas lávvordaga dámmáin Valle Tuvain, man ieš lohká sáhttit leahkit oalle suohpáhis heastan.
Arnt Pettersen vuittii váldogilvvus Unjárggas lávvordaga dámmáin Valle Tuvain, man ieš lohká sáhttit leahkit oalle suohpáhis heastan.
Mannan lávvordaga lágiduvvojedje heastadoalvegilvvut Unjárggas, ja oktiibuot ledje 45 heastta mielde gilvaleame gávcci iešguđetlágaš gilvvus, main oktibuot ledje ruhtavuoittut 85 000 ruvnno ovddas. Doalvegilvvut leat go heasta njolggásta, iige čuoskko.
Váttis heasta
Buot gilvvuin ledje, earret ponnigilvvuin, stuora ruhtavuoittut. Viđat ja váldogilvvu, vuittii juovlavuotnalaš Arnt Pettersen ja su galbmavárat heasta Valle Tuva. Dán gilvvus lei vuosttaš vuoitu 11 000 ruvnnu. Pettersen lea hirbmat duhtavaš heasttain, mii maiddái bođii riidengilvvus nuppi sadjái.
– Valle Tuva lea rievtti mielde buorre heasta, muhto sáhttá leahkit oalle «suohpáhis nisu». Vuojidettiin ferte čuovvot mielde čađat, ja gilvvu vuolde, go vudjen meattá mu nieidda ja geahčestin sutnje, de Valle čuoskulii veaháš, muitala Pettersen.
Bures dahkkon
Pettersen muitala doalveriidengilvvus, čihččet gilvvus, de riidii Beate Dervola Valle Tuvain, ja bođii nubbin.
– Lea oba bures dahkkon go birgii nu bures heasttain, go son ii leat guhkes áigái riiden gilvvuin, ja vel dáinna heasttain. Mun gal ieš dovddan heastta bures, go hárjehalan dainna beaivválaččat, muhto ahte son birgii nu bures lea oba bures dahkkon, lohká Pettersen.
Rámida lágideddjiid
Arnt Pettersen rámida maid lágideddjiid, Gaska-Finnmárkku Doalvesearvvi, go leat nákcen oažžut dan mađe stuora gilvvuid, gos nu ollu heastat leat mielde.
– Sii lágidedje buriid gilvvuid, ja leat ožžon ruhtadeddjiid maid mielde lokten dihte ruhtavuoittuid. In leat gullan goassige dán mađe vuoittuid báikkálaš gilvvuin olles Norggas, lohká Pettersen.
Duhtavaš čađahemiin
Gilvvuid lágidii Gaska-Finnmárkku Doalvesearvi, ja jođiheaddji Anne Rasmus, gii lea maid Ávvira journalista, lea hui duhtavaš gilvvuid čađahemiin.
– Buot manai bures, eat bártidan movtge ja lei maid hui lihkku dálkkiin go lei nu fiertu. Vaikko leimmet balus ovdal gilvvuid sihkarvuođa ektui, de manai buot bures, eaige lean lihkuhisvuođat. Čájehuvvui ahte čeahpes bargoveagain, erenoamážit Mátta-Várjjat doalveservviin, de lea álki lágidit gilvvuid, lohká Rasmus.
(Ášši joatká gova vuolabealde)
Guhkkin boahtán
Rasmus muitala gilvaleaddjit ledje boahtán Finnmárkkus, Suomas ja maid Hársttain. Okta gii lei Hársttain boahtán lei Mathis Ailu Eira Meløy.
– Son vuittiige guđat gilvvu, lieggavarat Jack nammasaš heasttain. Seamma heasta bođii nubbin, gávccát gilvvus, mii lei riidengilvvu lieggavarat heasttaide, ja dainna riidii Anne Riita Sara, muitala Gaska-Finnmárkku Doalvesearvvi jođiheaddji Anne Rasmus.
Sandra Bueng Hansen, gean birra Ávvir čálii ovdalaš gilvvuid, bođii goalmmát sadjái iežas gilvvus.