Sálašoaivvi šilta Romssas lea sárggoduvvon ja billistuvvon, dušše dárogiel namat šilta lea beassan ráfis. Dát lea mánnálaš dahku, oaivvilda sátnejođiheaddji.
Šilta mii Sálašvákkis čájeha bálgá Sálašoaivái ii leat beassan ráfis, soames dahje soapmásat leat billistan šilta mii lea čállon sámegillii.
– Mun čájehan gudnevuollegašvuođa olbmuide geain leat eará oaivilat, muhto mun in árvvusane gal olbmuid geat billistit sámegiel šilttaid, čálii sátnejođiheaddji Jens Johan Hjort iežas facebook siidui go oinnii gova šiltas.
Historjjálaš sámi guovlu
Blogga-čálli Jan-Thore Lockertsen fuomášii billistuvvon šilta cuoŋománu 5. beaivvi. Son govvii šilta ja lea čállán bloggačállosa mas deaddila historjjálaš dieđuid Sálašoaivvi birra.
– Miehtá Romssa guovllu gávdnojit duođaštusat ja kulturmuittut mat čájehit ahte dáppe elle sámit don dolin, sihke dálonat ja boazodoallit. Sálašvákki sámesiida lei beakkán ja dan gallededje olu turisttat, čállá Lockertsen.
Ii dáhto šiltadigaštallama
Romssa sátnejođiheaddji Jens Johan Hjort lea árat muitalan Ávvirii ahte cegge sámegielat šilttaid jávohaga iešguđetlágan almmolaš visttiide gávpogis, son ii dáhto rieja galbema geažil. NRK Romsii maid geažuha dán.
– Lea dárbbašmeahttun ja mánnálaš billistit sámegiel šiltta, muhto seammás lea dát hui duođalaš. Mun in dáhtošii šiltasoađi iežamet gávpogis, lohká Hjort.
Diŋgon ođđa šilta
Hjort áigu váldit vara billistuvvon šiltas, muhto lohpida cegget ođđa šilta mii čájeha bálgá Sálašoaivái. Romssa suohkan lea jo diŋgon ođđa šiltta.
– Dákkár dagut eai galgga čalmmustahttit Romssa. Mun lean hástalan billisteaddji miehtat dagustis ja muitalit manin šilta vuorjá, muhto in jáhke ovtta ge miehtat mánnálaš dagu, loahpaha Hjort NRK:i.
