Suodjalusas eai jáhke nagodit geahpidit luoitimiid 20 proseanttain 2030 rádjái. Baicce oaivvildit luoitimiid lassánit.
– Ii leat eahpádus ahte dat stuorra ja dáhálaš áŋgiruššamat mat leat Suodjalusas ovddos guvlui, go leat olu háhkamat ja alla aktiviteahtadássi, lasihit min dálkkádatgássaid luoitima, lohká Norgga Suodjalusa plána- ja ovddidanossodaga ceavzilvuođa seniorráđđeaddi Siv Fagerbekk Teknisk Ukebladii.
Norgga Suodjalus galgá nannejuvvot 600 miljárddain ruvnnuin gitta 2036 rádjái. Dat mearkkaša earet eará eanet fregáhtaid, čáhcevuolfatnasiid, áibmosuodjalusa, dasa lassin máŋga duháha olbmo galget virgáduvvot. Seammás lea ulbmil ahte dálkkádatluoitimat galget unniduvvot unnimustá 20 proseanttain 2030 rádjái, jus buohtastahttá 2019 ektui.
Fagerbekk dadjá ahte strátegiija ja mihttomearri ledje mearriduvvon áiggis (2022) go geopolitihkalaš dilli lei earálágan.
– Mii diehtit danin, ahte 20 proseantta mihttomearri šaddá gáibideaddjin. Seammás mii leat dálkkádat- ja luondduroasus. Danin šaddá boastut jus geahpidit ambišuvdnadási, dadjá son.
(©NTB)
