-Almmuhus-
OĐĐASAT Suodjalusa helikopter bisuhuvvo Girkonjárggas

Suodjalusa helikopter bisuhuvvo Girkonjárggas

-

-

Norgga dearvvašvuođaministtar ii vástit Stuora­diggái ambulánsagirdiid roasu birra ovdalgo ­golggotmánus. Davvi Dearvvašvuohta lea bivdán suodjalusa ain doalahit suodjalusa Bell-helikoptera Girkonjárggas.

Girkonjárggas lea ge leamaš ­guhkit áigge suodjalusa Bell-helikopter mainna vižžet ja dolvot buhcciid, go Babcock SAA ii leat nákcen oažžut doibmii buot ambulánsagirdiid Norggas maŋŋel go válde dan doaimma badjelii dán mánu vuosttaš beaivvi rájes.

Suodjalusa helikopterfálaldat fievrreduvvo ge viidáseappot ­Girkonjárggas borgemánu nuppi beaivvi rádjái.

– Mii leat ožžon dieđu Davvi-Norgga Unversitehta­buohcceviesus ahte Suodjalusa helikopteris lea leamaš stuora ávki. Go dasa lassin go Nuorta-Finnmárkku gielddat lohket dan fálaldaga buorren, de dat midjiide ­muitala ahte lea leamaš rievttes mearrádus go leat bivdán Suodjalusas ain veahki, dadjá Davvi Dearvvašvuođa doaibmi fágadirektevra Jon Tomas Finnsson preassadieđáhusas.

 

Moaitá go ii sáhte dalán vástidit

Leat ge leamaš stuora hástalusat doaimmahit dohkálaš ambulánsa­girdiid bálvalusa maŋŋel go Babcock SAA válddii badjelassii dan doaimma.

Guovddášbello­daga dearvvašvuođa áššiid ovddas­teaddji, Kjersti Toppe, sáddii dearvvaš­vuođaministarii Bent Høiei reivve geassemánu 12. ­beaivvi, mas dáhttu su ollislaččat čilget buot beliid ambulánsa­girdiid roasus.

Toppe mielas lea buorre go Høie lea dieđihan ahte son boahtá ­ovddidit čilgehusa Suorradiggái.

Seammás moaitá son go dearvvašvuođaministtar ii sáhte vástidit dalán man guhká bistá dát roassu, lassi goluid birra ja makkár váikkuhusat das šaddet muđui dearvvašvuođabálválussii.

 

– Lea dohkketmeahttun

Son lea maid jearran dearvvaš­vuođaministaris ahte makkár váikkuhusat dás šaddet  Babcock SAA kontráktii, ja makkár váikkuhusat dán roasus šaddet muđui dearvvašvuođabálvalusaide.

– Roassu ambulánsagirdiid ­bálvalusas lea dohkketmeahttun. Dat ráfehuhttá go dearvvašvuođaministtar ii sáhte vástidit man guhká jáhkká bistit dili. Buohkaide geaidda dál fállo heajut dearvvašvuođa gearggusvuohta lea dehálaš oažžut vástádusaid dáidda gažaldagaide, dadjá Toppe preassa­dieđáhusas.

- Advertisement -
-Almmuhus-