Eanandoallodepartemeanta dieđiha ahte Suodjalus sáhttá veahkkin doalvut fuođđariid go siviila resurssaid eai sáhte geavahit.
Boazodoalus lea duohta heahteguohtundilli čállá Eanandoallodepartemeahta preassadieđáhusas.
– Heahtedilli ii leat dan dihte go boazolohku lea beare allat, muhto go lea beare olu muohta mii lásse guohtuma. Boazu ii sáhte lunddolaččat guohtut nu go láve, čállá eanandoallo- ja biebmoministtar Olaug Bollestad preassadieđáhusas man departemeantta lea almmuhan.
Ministtar oaidná dili duođalažžan
Elliid čálggu ja boahttevaš buvttadeami dihte dáhttu departemeanta sihkkarastit bohccuide fuođđariid.
– Háliidan deattuhit ahte heahtedilli man boazodoallu vásiha dál ii leat dábálaš. Boazodoallu lea duođalaš ja gáibideaddji dilis. Earret go elliid čálggu váikkuhusaide, de doalvu heahti boazodolliid hui váttis ekonomalaš dillái. Dasa lassin lea heahti maid psyhkalaš noađđin boazodolliide. Vai sihkkarastá buori čálggu elliide ja maid boahttevaš buvttadeami, de háliidan ahte gieđahallat guohtundili buoremus lági mielde, lohká Bollestad preassadieđáhusas man departemeantta lea almmuhan.
Heahtedilli guoská birrasii 160 000 bohccui dál. Dat lea sullii 75 proseantta buot bohccuin Norggas. Stuora oassi Finnmárkkus, Romssas ja Nordlánddas vásihit duođalaš guohtundili dál. Leat erohusat orohagaid gaskkas man olu fuođđariidda lea dárbu. Erohus lea gaskal 50 ja 100 proseantta.
Eanandoallo- ja biebmodepartemeanta doalaha gulahallama Norgga Boazosápmelaččaid Riikkaservviin (NBR). Duorastaga lei čoahkkin eanandoallo- ja biebmoministaris Olaug Bollestadas ja NBR-jođiheaddjis Ellinor Jåmas. Operatiiva ovttadagat, mat leat Eanandoallodirektoráhtta ja Fylkkamánni, čuvvot šiehtadallamiid ovttaoaivilvuođa, dieđiha departemeantta preassadieđáhusas.
Suodjalusa geavahit
Fuođđariid doalvut gáibida olu boazodolliin geain lea guhkes mátki bohccuid lusa. Eanandoallo- ja biebmodepartemeanta lea leamaš oktavuođas politihkalaš jođihemiin Suodajlusdepartemeanttas geat leat dieđihan ahte sáhttet veahkkin doalvut fuođđariid bohccuide go siviila resurssaid eai sáhte geavahit.
Romssa ja Finnmárkku fylkkamánni lea čuovvolan dan ja dieđiha dárbbu ja čielggada lagabui Servvodatsihkarvuođa ja gearggusvuođadirektoráhtain (DSB).
Doarvái ruhta njukčamánu fuođđoriidoastimii
Juovlamánu 31. beaivvi 2019s lei 2,7 miljovnna ruvnno heahtegearggusvuođafanddas, muhto Boazodoallošiehtadusa olis lasihuvvui dasa 10 milljovnna ruvnnu.
Heahtegeargguosvuođafoanddas lei de 12,7 miljovnna ruvnno. Dat doarjja lea lassin dan 7,3 miljovnna ruvdnui maid orohagat ieža leat várren heahtegearggusvuhtii dan guovtti maŋemus jagi.
– Orohagaid ruhtavuorká lea guorranan dál. Dasa lassin lea vuollel 3 miljovnna heahtegearggusuođafoanddas geavahuvvon. Heahtegearggusvuođafoanddas lea measta 10 miljovnna ruvnno, mii galgá leat doarvái gokčat fuođđariid oastimiid njukčamánu, dieđiha departemeahta.
Fertejit ohcat ovdal njukčamánu 30. beaivvi
Vai sihkkarastet heahtegearggusvuođa doarjjamáksimiid ovdal beassážiid, de fertejit orohagat ohcat doarjagiid ovdal njukčamánu 30. beaivvi, vai jođánit meannuduvvo ja mákso, de lea dehálaš ahte ohcamat šaddet riekta ja ahte dárbbašlaš dieđut leat mielde. Deattuhuvvo maid ahte ohcamušat, mat bohtet maŋŋel njukčamánu 30.beaivvi, meannuduvvojit dađistaga.
Eanandoallo- ja biebmodepartemeanta čuovvu guohtunroasu ovdáneami ja árvvoštallet dađistaga dárbbu doaimmaid ektui ovttasráđiid NBR:in, čállá Eanandoallo- ja biebmodepartemeanta preassadieđáhusas.
