Sunnje ii šatta goassege menddo olu «bling-bling»

Moai čohkkedetne goabbat beallai beavddi stobus, ja Inger Marlene guossoha gáfe.

Okta dat vuosttaš maid muitala lea ahte son liiko juogadit duddjongoansttaid buohkaiguin. 

– Jus mii eat juogat, de mannet buot goanst­tat duššái. Mun gal lean áiggi mielde fuobmán ahte lea hui dehálaš juogadit goansttaid. Manin daid čiegadit? jearrala Inger Marlene. 

Mánnán álggii juo liikot

Ovdal go moai álge dujiid birra hupmat ja goansttaid juogadit, de jearralan Inger ­Marlenes mas son fuomášii álgit muoidduid goarrut ja deaddit daid dujiide. 

Son muitala, mánnán muitá go su Máret ipmi lávii fitnat guossis, ja son lávii buot ­muoidun juolgevuođus oaivečohkii.

Inger ­Marlene muitá mo sus lávejit bievssuin ja ­gápmagiin silbbat, gahpiris helmmot ja feara mat heangájit.

Máret imis ledje šealgidiŋggat alo go gávttiin lei čiŋadan. 

– Mun láven hui jaska čohkkát go ipmi lei guossis. Láven dárkilit geahčadit mo dat leat biddjon, ja oktii jurdilin ge, go mun stuorun de mun áiggun seammalágan šaddat. Mu ­mielas lei dat máilmmi fiidnámus, muittaša Inger Marlene moju njálmmiid. 

Dáinna lohká Inger Marlene álggii dat beroš­tupmi dasa, ja nu go juo buot eará, de son álggii veahážiid mielde muoidduid bidjat feara gosa. 

Seammalágan go ipmi

– Go de álgen dieidguin, de lávii Mihkkal eanu dadjat «ihi, dál gal Inger álggii seammaládje go mu eamit», muitalastá vel lassin. 

Inger Marlene boagusta ja dadjá go oanehaš áigi golai, de gal son manai Máret imi meaddel daiguin muoidduiguin. 

– Ii das lean šat geahči, muhto dies dat vulg­gii goit beroštupmi, dadjala movttegit. 

Lonuhit ja lasihit muoidduid

Inger Marlene muitala ahte sus leat olu dujiin muoiddut darvvihuvvon, ja áiggi mielde sáhttá dolkat muhtin ivnniide.

– Mun láven muhtimin dušše lonuhit daid muoidduid maid lean bidjan, vai rievdá veahá ivdni duojis. Dainnalágiin sáhttá orrut dego fas ođas, dadjá Inger Marlene. 

Hutkás duojár dadjá maid ahte jus ii oro astame ođđa veasku goarrut, de lea vejolaš veaskkusiidui heŋget dahje goarostit muhtin čuvges ivnnat muoidduid.

Go dat lokte olles duoji fas, erenoamážit sevdnjes náhkii vuostá šaddá hui fiinnis. 

Hoahppu iige áigi duddjot

– Jus lean hui hoahpus, iige leat áigi duddjogoahtit. De láven geahččat makkár biktasat mus leat, ja mo daid orro heiveme čiŋahit,
čilge Eira. 

Son muitala maid ahte go lea gávppašeame biktasiid, de láve aivve geahččat čikŋabiktasiid maid sáhttá hervet ja mas lea gáktehápmi.

– Dakkár biktasiid ii dárbbat eará veahá rievdadit, nu go hearvvaid goarostit, dadjá Inger Marlene. 

– Geahččat ivnniid

Bivddán Inger Marlene muitalit mo son fuobmá makkár muoidu heive gokko ge, go oidno su dujiin ahte eai leat soaittáhagas biddjon makkárge muoiddut. 

– Ovdamearkka dihte liinnis de lea vuosttaš maid geahčan makkár ivdni riesaldagain leat, nu go dán liinnis. Buot muoiddut mat dies leat gitta, leat ivnnit mat gávdnojit liinnis ja riesaldagain, in bija goasse dakkár ivnni mii ii oba leat ge duojis, rávve Inger Marlene. 

Jođánit ođasmahttit

– Jus áigu jođánit ođasmahttit, de lea dieđusge goansta girjjatgávttis lonuhit holbbi ja soadjagežiid, dainna orru dego ođđa gákti de, dadjá son. 

Buot jođáneamos ođđa čiŋaid alcces ordnet gal lea dábálaš biktasiid hervestit ja muoidduid bidjat, lohká Inger Marlene. 

– Ii goasse beare olu

Go jearan Inger Marlenes lea go son goasse jurddahallan ahte dál gal bijai menddo olu muoidduid, de bohkosa njálgát ja dadjá ahte ieš ii gal leat goasse dan jurdilan. 

– Earát lávejit sáhttit lohkat ahte mun mannen badjel ráji, muhto mun lean diet mii mun lean, loahpaha Inger Marlene ja mojohallá.