-Almmuhus-
-Almmuhus-
OĐĐASATSunna (17) háliida unnidit bivttasgolaheami

Sunna (17) háliida unnidit bivttasgolaheami

-

-

Kárášjoga giehtaduodjesearvi lágida Bivttaslonuhanbeaivvi.

Oallugiin dáidet menddo olu biktasat bivttasskábes, muhto aŋkke áiggošeimmet ođđa biktasiid. Lávvardaga, njukčamánu 26. beaivvi, lágiduvvo Bivttaslonuhanbeaivi miehtá riikka. Kárášjoga giehtaduodjesearvi lágida beaivvi Sámi Dáiddaguovddážis.

– Mii háliidat álkit válljet birasseasti vejolašvuođaid árgabeaivvis. Bivttaslonuhanbeaivi lea juoga masa buohkat sáhttet searvat ja nu sáhttit ođasmahttit bivttasskábe nu ahte eai ráhkaduvvo eambbo biktasat, dadjá Luonddugáhttenlihtu Bivttaslonuhanbeaivvi prošeaktajođiheaddji, Janne Gillgren, preassadieđáhusas.

Vuosttaš geardde searvá

17-jahkásaš Sunna Svendsen berošta birasseastimis. Son lea Kárášjoga giehtaduodjesearvvi miellahttu ja leage vuosttaš geardde searvamin Bivttaslonuhanbeaivái.

– Galgá nu ahte olbmot sáhttet boahtit min lusa ja juogo lonohallat biktasiid dahje goarrut ja divodit boares biktasiid. Buvtte ovdamearkka dihte alddát boares báiddi ja geahčat gávnnat go ođđa biktasa man earát leat buktán mainna sáhtát lonohallat, muitala Sunna Svendsen lágideami birra.

– Mii háliidat movttiidahttit olbmuid divodit iežaset boares biktasiid ja maiddái čalmmustahttit ahte biktasat, maidda ieš it liiko dahje ii heive, de soaitá earáide heivet hui bures. Boares biktasat eai dárbbaš dušše bálkestuvvot, iige dárbbaš álo ođđa biktasiid oastit, lasiha Sunna.

Hásttuha nuoraid searvat

Sunna Svendsen vázzá joatkkaskuvlla Kárášjogas. Son berošta duddjot ja goarrut. Son lea giehtaduodjesearvvi bokte beassan searvat iešguđet kurssaide ja liiko duddjot ja goarrut. Son váldá ovdamearkan beakkán Jenny Skavlana, guhte ieš goarru biktasiid.

– Kárášjohkalaččat, nu go eará báikki olbmot, han beroštit biktasiin, stiillain ja motas, muhto eai Kárášjogas gávdno bivttasbuvddat. Dasa lassin lea maŋimuš jagiid leamaš bivnnut geavahit boares biktasiid dahje ieš goarrut, nu movt Jenny Skavlan dahká, muitala Sunna.

Son doaivu lágideami šaddat bivnnuhin ja hásttuha erenoamážit nuoraid boahtit lágideapmái.

– Sávan olbmot oidnet man somás vejolašvuohta dát lea.

GOARO BOARES BIKTASIID: Bearjadaga ja lávvardaga beasat Sámi dáiddaguovddážis divodit ja goarrut boares biktasiid. Govva: Else Marie Isaksen, Kárášjoga giehtaduodjesearvi.
GOARO BOARES BIKTASIID: Bearjadaga ja lávvardaga beasat Sámi dáiddaguovddážis divodit ja goarrut boares biktasiid. Govva: Else Marie Isaksen, Kárášjoga giehtaduodjesearvi.

Lágiduvvo bearjadaga ja lávvardaga

Kárášjoga giehtaduodjesearvi lea gávdnamis Sámi Dáiddaguovddážis sihke bearjadaga 25. beaivvi diibmu 16-18, ja lávvardaga 26. beaivvi diibmu 09.30-11. Doppe sáhttá lonohallat biktasiid, ja maiddái searvat dasa maid ieža gohčodit «ođasmahttin divohahkii», gos sáhttá divodit boares biktasiid ja ráhkadit ođđa biktasa.

– Bivttaslonuheapmi ja divodeapmi lea somás ja álkes birasdoaibma, ja buorre molssaeaktu gávppašeapmái. Lea mearkkašahtti divodit iežas biktasiid, ja mii oaidnit man lihkolažžan olbmot šaddet dainna, dadjá Kárášjoga giehtaduodjesearvvi Else Marie Isaksen. 

-Almmuhus-