Dihtet go ahte juovlabiepmut, nu go spiinneerttet, boahkkuduvvon biergu, šukkoláda ja rosiinnat sáhttet leat heaggavárálaččat jus beana borrá daid?
Juovllat leat oallugiidda herskostallanáigi ja máŋggas háliidit iežaset elliide maid addit herskkuid.
Muhto elliiddivššár ja If dáhkádusfitnodaga gálvohoavda Kine Bjølsen Opstad ávžžuha jurdilit maid beatnagiidda addá borrat.
– Vaikko orru buorre addit beatnagii iešguđetlágan herskkuid, de sáhttá buoiddes ja sálttes juovlabiebmu addit čoavjeváttuid beatnagii. Muhtun biepmut fas sáhttet leat heaggavárálaččat, lohká Opstad.
Šukkoláda čiegusvuohta
Oallugat eai dieđe ahte šukkoládas lea juoga man namma lea teobromin, mii lea beatnagii mirku. Ja dat sevdnjes šukkoládat leat buot várálepmosat.
– Teopromin váikkuha váibmui ja vuoinnamaččaide. Jus beana lea borran šukkoláda, de sáhttá mearkkašit ahte beana rapmáluvvá, soalssida, šaddá váibbasin ja lea ráfeheapmi, lohká son.
Jus ollu lea borran, de sáhttá váibmoritma šaddat jeavddeheapmin, beana stiivu, suoibu ja oažžu geasahaga. Vearrámus mii sáhttá dáhpáhuvvat lea ahte beana jápmá.
– Jus fuomáša ahte beana lea borran šukkoláda, de berre váldit oktavuođa mirkoguovddážiin dahje šibitdoaktáriin nu jođánit go vejolaš, lohká Opstad.
Berre váruhit jus beana ii leat hárjánan biebmobázáhusaide
Jus beana ii leat hárjánan oažžut biebmobázáhusaid, de lea earenoamážit várra ahte beana oažžu čoavjeváttuid, go ii leat hárjánan dasa, ja go juovlabiebmu lea hirbmat buoiddes ja sálttes biebmu, lohká son.
Son ávžžuha baicca addit vuoncábierggu, mas eai leat dávttit ja maiddái sáhttá oastit beatnatnjálgáid.
Maid ii ávžžut addit beatnagii:
- Šukkoláda
- Spiinneerttega ja eará buoiddes juovlabiepmuid
- Sálttes ja máistojuvvon biepmuid, nu go boahkkuduvvon bierggu ja medistergáhkuid
- Drueriid, rosiinnaid, lávkki ja nihtiid
- Dávttážiid ja eará mii sáhttá darvánit čoddagii ja čoliide
- Mirkkolaš juovlaliđiid
