Maŋemus jagiid ođđabeairuohta ávvudemiin leat badjelaš 30 olbmo bahut roasmmohuvvan čalmmiin dan dihte go leat geavahan dollarusona, ja ii okta ge geavahan čalbmesujiid.
Maŋemus jagiid ođđabeairuohta ávvudemiin leat badjelaš 30 olbmo bahut roasmmohuvvan čalmmiin dan dihte go leat geavahan dollarusona, ja ii okta ge geavahan čalbmesujiid.
Lea Sihkarvuođa- ja gearggusvuođadirektoráhtta (DSB) mii buktá dáid dieđuid.
– Plastihkkačalbmeláse lea hálbbes vuohki movt suddje iežas čalmmiid dán eahkeda ja lea bahá oažžut dollarusoniin bihtáid čalmmiide. Mii ávžžuhit buohkaid geavahit čalbmesujiid nu guhká go leat lahka dollarusoniid, sihke mánáid ja rávisolbmuid, muitala Tryg Forsikring diehtojuohkinráđđeaddi Torbjørn Brandeggen.
Ávžžuha buohkaide čalbmesujiid
Diibmá ledje 18 olbmo geain roasmmohuvve čalmmit, ja ii ovttasge lean čalbmesuodji. Oktiibuot ledje 47 olmmošvahágat suorpmain, ámadajuin, guluin ja čalmmiin diibmá. Stuora oassi leat dievddut geat roasmmohuvvet.
– Lea eahpidahtti ahte logis dain geat roasmmohuvve diibmá ledje vuollel 18 jagi boarrásat, vaikko lea 18 jagi ahkemearri sihke oastit ja geavahit dollarusona. Buohkat berrejit geavahit čalbmesujiid, sihke son gii cahkkeha rusona ja sii geat gehččet. Maiddái dollarusona dihte maid gieđas doallá (stjerneskudd), ferte geavahit čalbmesujiid, vai mánáid čalmmiide ii ruso dolla, dadjá son.
Loga dás makkár dálkki dieđihit ođđabeairuohta šaddat.
Gárrenastin ja dollarusonat várálaččat
Eatnasat roasmmohuvvet go cahkkehit dollarusoniid go leat gárihuvvan.
– Lea várálaš dollarusoniid cahkkehit gárrenoaivvis. Juohke jagi oaidnit ahte vahátlohku lassána jahkemolsašumis, ja dat leat buollin- ja olmmošvahát. Jus cahkkehat monsterbatteriija, de gal berret leat áibbas čielggus, rávve Brandeggen.
Čorge iežat maŋis
Bávkkalamasat ja dollarusonat sáhttet garrasit vahágahttit vaikko ii leat nu ollu. Ii leat lohpi addit vuolleahkásaččaide dollarusoniid.
– Muitte ahte rávisolbmuid ovddasvástádus lea váruhit ahte mánát ja nuorat eai leat lahkosis das gos cahkkehat rakeahta. Ja muitte čorget iežat maŋis. Ollu mánát gávdnet boares rusoniid olgun. Muitte fal dalle čorget iežat maŋis go leat bávkalan dollarusoniid, neavvu Brandeggen.
