Son lea badjel 30 jagi bargan oažžut alcces siidaoasi, ja dál álggii ášši Sis-Finnmárkku diggegottis go son lea gáibidan boasttuvuođaid su vuostá njulgejuvvot.
Odne diibmu 09:00 dearpalii duopmár beavdái ja rabai meannudeami.
Vuosttaš maid su advokáhtta Trond Biti dagai dikkis, dat lei rihkkut duopmára, Máret Aile Sara, áigemeari man guhká áiggi beassá iežas čilgehussii atnit.
Dat čájeha man moalkás luodda lea leamaš Sokkis dainna siidaosiin, go dan lei maid moalkái čilget.
Heaitinduopmu
Dikkis dajai Biti dan duohtavuođa man čađa Sokki šaddá mannat, ahte sutnje ii soaitte gávdnot árbmi.
– Sus lea heaitinduopmu jus dikkis eai oainne dan boasttuvuođa mii su vuostá lea dahkkon, eai ge doahttal su gáibádusa, dajai son iežas čilgehusas.
Sokki gáibádus lea ahte Eanandoallodepartemeantta mearrádus, ahte son liikká ii oaččo siidaoasi man Boazodoallostivra lei sutnje addán, dat galgá hilgojuvvot, ja ahte sutnje doalahuvvo siidaoassi Orddas.
