-Almmuhus-
GUOIMMUHEAPMI– Su haga mis eai livčče nu ollu konsearttat ja dáhpá­husat dáppe mat...

– Su haga mis eai livčče nu ollu konsearttat ja dáhpá­husat dáppe mat buktet orrun­movtta

-

-

Jane Juuso oaivvilda ahte Kim-Erling Methi Johansen ánssáša leat Ávvira juovlafuomášumi árgabeaisáŋgárin. 

Kim-Erling Methi Johansen lea njunnošis lágideamis ja čađaheamis konsearttaid Scene Eventa bokte Unjárggas. 

– Son bargá eaktodáhtolaččat eanaš kulturdoaluin dáppe min gielddas, ja vel eará gielddain dás lahkosis. Son lea maid fárus lágideamen Eddemannak, min čakčafestivála, čállá Jane Juuso. 

Ovddida kultuvrra ja musihka

– Son ánssáša juovlafuomášumi go viššalit ovddida kultuvrra ja musihkka min guovllus. Su haga mis eai livčče nu ollu konsearttat ja dáhpáhusat dáppe mat buktet orrunmovtta, vuođđuda Jane Juuso manne son lea evttohan Kim-Erling Methi Johansena Ávvira juovlafuomášumi árgabeaisáŋgárin.

Vuosttaš reakšuvdna

– Dan lea somá gullat, dadjá Kim-Erling.

 Kim-Erling Methi Johansen lea mielde álggaheamen searvvi man lea gohčodan Scene Events ja searvvi ulbmil lea lágidit konsearttaid Unjárggas. Dan bokte sii lágidit konsearttaid birra jagi ja sin mihttu lea lágidit moadde konseartta juohke mánu.

– Mis leat dál leamaš olu eambo konsearttat Unjárggas, jáhkan mii leat lasihan konseartadoaimmaid Unjárggas vissá 100 proseanttain dan ovtta jagiin goas mii leat leamaš doaimmas, boagusta Kim-Erling.

– Lea hui somá ahte atnet árvvus maid barggan ja mun lean deaivvadan maiddái olbmuiguin konsearttain maid mii leat lágidan geat rámidit dan barggu maid leat dahkan. Lea hui somá oažžut dakkár fuomášumi, lohká  juovlafuomášumi árgabeaisáŋgár Kim-Erling. 

– Mii lea du movttiidahttán lágidit konsearttaid?

– Mun lean ieš barggan olu kultuvrrain, konsearttaiguin ja dál lean orron Unjárggas 2012 rájis. In dušše liiko bargat dainna, muhto liikon maid ieš vuolgit konsearttaide. Mun ohcalin dan fálaldaga Unjárggas ja doppe eai lean nu olu lágideamit ja konsearttat maidda sáhttit searvat. Dalle šattai nu ahte álggahedjen juoidá ja doaivumis lea muhtin váldán badjelasas ja joatkán dan barggu go mun manan ealáhahkii ja šattan boaresolmmožin, de beasan vuolgit ieš ja návddašit konsearttaid, boagusta Kim-Erling.

Sámi ja báikkálaš musihkka

Sis lea ovttasbargu Musikk i Nordain man Romssa ja Finnmárkku fylkkagielda jođiha, ja konsearttain besset olbmot vásihit iešguđetge sáŋŋeriid.

– Mis lea leamaš sámi konsearttat ja lágideamit, muhto mii háliidat bidjat eanet searaid sámi musihkkii ja háliidat ealáskahttit báikkálaš musihkkáriid min gielddas ja min guovllus, lohká son. 

– Juovlasávaldagat?

– Ráfi eatnamis, šiegas mánát ja ođđa loabáhiid, loahpaha Kim-Erling Methi Johansen.

Juovlamánu geiget mii Ávviris juovlafuomášumi olbmuide geat ánssášit liigefuomášumi barggu ovddas maid dahket illun earáide. Cavgil midjiide gii ánssášivččii juovlafuomášumi. Čális e-poastta post@avvir.no. Čális oanehaččat manne juste dat olmmoš ánssášivčče juovlafuomášumi.

-Almmuhus-