-Almmuhus-
-Almmuhus-
OĐĐASAT – Stuorra vejolaš­vuohta čájehit sámi girjjálaš­vuođa máilbmái

– Stuorra vejolaš­vuohta čájehit sámi girjjálaš­vuođa máilbmái

-

-

Norga galgá leat váldoriika Frankfurter Buchmesse nammasaš girjemeassuin, mat leat deaŧaleamos girjemeassut máilmmis. Maiddái sámi girjjit ja girječállit leat ovddastuvvon doppe.

– Dát addá buori vejolašvuođa sámi girjjálašvuhtii ja mun lean ilus dan geažil, dadjá sámediggeráđđi Henrik Olsen preassadieđáhusas. Son áigu searvat girjemeassuide ja Sámediggeráđđi lea maiddái addán doarjaga sámi searvamii.

Girjemeassu Frankfurtas, mii lágiduvvo golggotmánus, lea máilmmi deaŧaleamos deaivvadanbáiki riikkaidgaskasaš girjesurggiide. Dohko lávejit boahtit badjel 300.000 guossi badjel 100 riikkain, 7000 lágádusa ja 10.000 journalistta.

2019:s lea Norga ožžon rolla girjemeassuin Frankfurtas go nammaduvvui guosseriikan. Dainna rollain beassá Norga čalmmustit iežaset girjjálašvuođa ja kultuvrra girjemeassuin. Dan oktavuođas lea sierra guossesadji gos bovdejuvvon girječállit Norggas galget beassat oainnusmahttit sin girjjálašvuođa.

Sámi lágádus- ja aviisasearvi (SÁLAS) ja Sámi Girječálliid Searvi (SGS) servet oainnusmahttin dihtii sámi girjjálašvuođa ja sámi girječálliid.

Addá doarjaga searvamii

Sámediggi čállá preassadieđus ahte Sámediggeráđđi lea addán doarjaga Sámi lágádus- ja aviisasearvái 200 000 ru. SÁLAS lea ovttas NORLA:in, mii lea organiseren Norgga searvama Frankfurtas 2019:s, sihkkarasttán ahte maiddái sámi girjjit ja girječállit leat ovddastuvvon. Girjemeassuid oktavuođas jorgaluvvojit muhtun sámi girjjit eaŋgalasgillii, nu gohčoduvvon geahččalanjorgaleamit, oainnusmahttin dihtii sámi girjjálašvuođa máilbmái.

– Sámi girjjálašvuohta lea oassin norgga girjjálašvuođa árbbis. Dát lea áidnalunddot vejolašvuohta gaskkustit ja ovddidit sámi girjjálašvuođa ja servodatdigaštallama miehtá máilmmi, dadjá sámediggeráđđi Henrik Olsen.

23 000 ruvdnosaš doarjja lea addon Sámi lágádussii, mas ii leat oktavuohta SÁLASii, ja Susanne Hætta ovddasta sin doaluin. Olsena mielas lea deaŧalaš ahte sámi lágádusat besset searvat stuorra riikkaidgaskasaš girjjálašvuođa arenas.

– Doppe lea stuorra vejolašvuohta čájehit sámi girjjálašvuođa ja mun lean hui ilus dan geažil, dadjá sámediggeráđđi.

Doarjja teáhterbihtá čájáhussii

Sámi girjjálašvuohta ja kultuvra lea oidnosis čađa gaskka girjemeassuin máŋggalágan hámiiguin.

Sámediggeráđđi lea maid addán doarjaga Beaivváš sámi nationála teáhterii, 150 000 ru. Sii mannet girjemeassuide bihtáin Johan Turi birra, ja galget leat máŋga čájáhusa dan vahkkus.

– Dat lea heivvolaš bihtá, danne go Johan Turi lohkkojuvvo leat vuosttaš sámi girječállin girjjiin “Muitalus sámiid birra”, mii almmuhuvvui 1910:s. Mun illudan go beasan dan vásihit Frankfurtas. Šaddá gelddolaš vuolgit Frankfurtii čuovvut min čeahpes dáidda- ja kulturbargiid ja oaidnit movt dát sáhtášii sámi girjjálašvuođa gaskkustit stuorát márkanii, dadjá sámediggeráđđi Henrik Olsen loahpas preassadieđáhusas.

- Advertisement -
-Almmuhus-