-Almmuhus-
OĐĐASATStuorra erohusat AÁF hattiin ja fálaldagain

Stuorra erohusat AÁF hattiin ja fálaldagain

-

-

Dáid beivviid rahppojit Astoáigefálaldagat fas maŋŋel geasseluomu. Muhto leat stuorra erohusat AÁF-fálaldagain, sihke hattiin ja makkár doaimmat fállojit mánáide.

Divraseamos AÁF-ortnega gávnnat Smøla gielddas Møre ja Romsdalas.

Doppe mákset váhnemat 3877 ruvnno AÁF ollesáiggesajis, Grunnskolens Informasjonssystem (GSI) 2018/2019 loguid mielde.

Dakka maŋis boahtá Sauda gielda Rogalánddas, gos ollesáigesadji máksá 3712 ruvnno, ja Sauherad Telemarkus, gos ollesáigesadji máksá 3460 ruvnno.

 

Nullas 4000 ruvdnui

Buot hálbbimus lea Rivttákas Tromsa fylkkas, gos AÁF-sadji lea nuvttá.

Bearalváhki Finnmárkkus lea nubbin, gos máksá 850 ruvnno.

Goalmmádin hálbbimus fálaldat gávdno Sunndalas, Møre ja Romsdalas, gos máksá 1057 ruvnno mánnui.

Sihke Kárášjogas ja Guovdageainnus máksá ollesáigesadji 1800 ruvnno. 

Hattit leat gaskkál nulla ja 4000 ruvnno, muhto ii leat daddjon ahte sii geat mákset eanemusat ožžot buoremus fálaldagaid.

Leat stuorra erohusat AÁF-fálaldagaid kvalitehtas, nationála árvvoštallamiid mielde mat leat dahkkon NTNU Servvodatdutkamiin 2018:s.

 

Háliidit rámmavuogádaga

Ráđđehus lei addán bargogohččama NTNUi ja ovdanbuktui juovlamánus.

Muhtin AÁF:at čilgejuvvojit dego “rádju” gos mánát ožžot bearráigeahču.

Váhnenlávdegoddi vuođđoskuvlaoahpahusas (FUG) lea guhká váillahan dákkár árvvoštallama ja bivdet dán árvvoštallama čuovvolit.

– Mii rehkenastiimet ahte dat stuorra erohusat bohtet bajás dán rapportas, ja dasto báhkkehit ovtta standárda AÁF-fálaldaga, muitala FUG jođiheaddji Gunn Iren Gulløy Müller NTB:i.

Odne ii gávdno maksimálahaddi AÁF:aide, eai ge nationála vuoládusortnet, dahje nationála gáibádus dasa mo fálaldat galgá organiserejuvvot.

FUG oaivvilda ahte galgá biddjot haddemearri ja rámmavuogádat AÁF:aide nugo mánáidgárddin lea.

Sii sávvet ahte biddjo gáibádus galle bargit galget leat, ja gallis galget leat pedagogat.

– Mii ohcalit ollislaš fálaldaga. De lea dárbbašlaš ahte lea gealbodahtolaš pedagoga gii jođiha AÁF:a, vai AÁF:at galget leat eambbo go dušše “rádju” mánáide, dadjá Müller.

 

©NTB

-Almmuhus-