Mánnán váhku «guollelihkku» gilvvu vuoitti dieđihii gilvui dan stuorimus guoli maid goassege lea sáivačázis goddán.
Mánnán váhku «guollelihkku» gilvvu vuoitti dieđihii gilvui dan stuorimus guoli maid goassege lea sáivačázis goddán.
Váhku 28, mii lea mannan váhku, «guollelihkku» vuoiti šattai guđa jahkásaš John Mikkelsen Utsi.
Son fiškkaslii kilosaš rávddu Ittunjárgga geažis, Ivgu suohkanis.
Doppe sus ja su bearrašis lea geasseorohat bohccuide, ja doppe leigga áhčiinis bivdiime go guolli dohppi.
Gáfestaladettiin bođii
Go Joavnna áhčči, Mikkel J. Utsi, viežžá guollevuoittu lunta ovddas, de son muitala dan erenoamáš guollemuitalusa.
Son muitala soai leigga gáfestallat álgán.
Dola cahkkehan ja gáfe duldehan, go oaidniba bákŋá okta stuora guolli gáddeguora, jođus sudno guora.
Mikkel lohká son siđai lunta mannat bálkestit vuokka go lahka bođii.
– Dat gal lei gitta ovttatmano, muitala son.
Áŋgir bivdit
Mikkel J. Utsi muitala luntta hui áŋgirin bivdit, ja lea maid mearas goddán stuorit guoli go dat rávdu lei.
Sii lávejit fatnasin maid mannat meara ala, vutnii bivdit.
Utsi muitala ahte jávri gos sii ledje, lea son áhčiinis mielde leamaš go lei 11-jahkásaš. Son lohká dalle leamaš stuora guliid dan jávrris, muhto lei nohkkon.
Govven: Nils Johan Vars
Buorránan
Son muitala dalle dat stuorimus guolit ledje hui šliippárat, muhton gaskageardán sturrodat guolit, dat ledje issoras buorit.
– Doppe ledje nohkkán guolit, dál dat leat fas álgán šaddat, muitala son.
Geasseorohagas
Go Mikkel J. Utsi fitná stávrrá viežžame, de ii sáhttán luntta, Joavnna, leat mielde.
– Mun lean finadeame dušše dáppe, Joavnna lea báhcan mearragáddái. Mun attan stávrrá sutnje go joavddan su rádjai, lohpida Mikkel J. Utsi vel loahpas.
«Guollelihkku» vuoittit.
Vuosttaš «Guollelihkku» vuoitti šattai Kevin Henrik Buljo, váhku 25/26 vahkuid ovddas, mii bisttii duorastagas geassemánu 23. beaivvis gitta sotnabeaivái suoidnemánu 3. beaivái.
Váhku 27:s ii dieđihan okta ge guoli, muhto váhku 28:s ledje golmmas geat dieđihedje. Sin gaskas gessui ge de vuoitti, gii šattai John Mikkelsen Utsi.
Vejolaš dieđihit
Dán váhkus, mii lea váhku 29, lea dieđihuvvon okta guolli «Guollelihkku» gilvui, nu ahte leat buorit vejolašvuođat vuoittit stávrrá.
Dieđihit sáhttá gitta sotnabeaivái diibmu 23.59 dáppe.
Gilvu bistá sotnabeaivái suoidnemánu 31. beaivái, diibmu 23.59
