Nu go ovddit vahkkuid, de lea Ávvir dán vahkku maid vuorbádan ođđa oaggunstávravuoiti. Mathis Mathisen Sara vuittii mannan vahkkus ođđa stávrrá.
Nu go ovddit vahkkuid, de lea Ávvir dán vahkku maid vuorbádan ođđa oaggunstávravuoiti. Mathis Mathisen Sara vuittii mannan vahkkus ođđa stávrrá.
Mannan vahkku sáddejedje vihtta máná oaggungova Ávvira mánáidoaggungilvui. Sin gaskkas vuorbáduvvui Mathis Mathisen Sara.
– Mathis lea hui viššal oaggut. Son lea dál maid oaggumen rávdoveajehiid, muitala bártnáža eadni, Inga Marit Anne Utsi.
Son gottii Heammojávrris eanus hávgga mii dettii 1,9 kg. Utsi muitala ahte lei oalle stuora hávga mii lei badjel mehterbeali stuoris.
Hávga snelkii
Bártnáža eadni ii lean ieš fárus go bártnáš gottii stuora hávgga, muhto son máhttá aŋkke muitalit movt dat dáhpáhuvai:
– Mathis lei hui gáddeguora čuožžumen go lei oaggumen. De fuomášii su unnaoappáš dan hávgga ja cuigii sutnje gokko guolli lei. Mathis fuomášii dan ja bálkestii vuokka hávgga guvlui. Vuogga manai hávgga oaivvi guora ja dalle hávga fáhkka njuikii hirbmadit, orui dego snelkemin vuokka. Hávga lei de gitta vuokkas. Son ii muitalan gal ahte bártidii go guliin, muhto son oaččui goit dan gáddái.
Áŋgir oaggut
Inga Marit Anne Utsi muitala ahte Mathis láve hui dávjá oaggut.
Sii ledje vahkku áigi oaggumen mearragáttis.
Bártnáš gottii hirbmasit guliid.
Dál maŋemuš áiggi lea son rávdoveajehiid oggon.
– Mathis oaggu juohke beaivvi go sáhttá, muitala bártnáža eadni.
Bearaš orru eatnogáttis ja danin láve Mathis hui dávjá eanus oaggut.
Utsi muitala ahte son láve ollu hávggaid goddit eatnogáttis.
Mathis láve mearas oaggut gos lea goddán guliid dego sáiddiid ja dorskiid.
Jávrriin maid lohká olu rávdduid goddán.
Guollelihkku
Viššalis Mathis Mathisen Sara vuittii mannan vahkkus ođđa oaggunstávrrá.
Utsi jáhkka ahte hávga maid gottii eanus lea dat stuorimus guolli maid bártnáš lea goddán.
Sus lei albma guollelihkku go dainna guliin vuittii ođđa stávrrá.
– Jua dieđusge jáhkán ahte son boahtá geahččalit stávrrá. Moai osttiime duo stávrrá, muhto dát lei beare stuoris sutnje. Ean moai oba geahččan ge rámbuvrras man stuoris stávrá lei. Oba buorre go son vuittii dál stávrrá.
Ávvir sávvá ahte son ain joatká leahkit seamma áŋgiris guollebivdi ja ahte ođđa stávrráin gottášii guliid.
