– Stuorámus áittan min luondduluossa- ja mearradápmotnáliide

– Gitta 29 proseantta gođđoluosas ja gođđodápmohis sáhttet jávkat sihke Álttájogas ja eará čázádagain. Dál fertejit ovddasvástideaddjit gullat, dadjá Bargiidbellodaga sámediggejoavkku parlamentáralaš jođiheaddji Ronny Wilhelmsen preassadieđáhusas.

Lohká guollebiebmama gáttis gelddolažžan

Raporttas man Norgga Luonddudutkama ásahus (NINA) almmuhii ođđajagimánu 10.b.2018:s čilgejuvvo mot luossadihkit váikkuhit luondduluossa- ja mearradápmotnáliide. Raporta čoahkkáigeassá ahte leat čielga duođaštusat dasa ahte levvet eanet luossadihkit guovlluin gos leat ollu guollebiebmandoaimmat.

– Guollebiebmanealáhus lea dehálažžan servvodagaide min rittuin, muhto nu movt raporta čilge dan, de leat luossadihkit stuorámus áittan min luondduluossa- ja mearradápmotnáliide, ja dát lea duođalaš, dadjá Wilhelmsen.

– Mii fertet buorebut hálddašit luossadihkiid leavvama guovlluin gos leat ollu guollebiebmandoaimmat. Guollebiebman gáttis lea gelddolaš prošeakta jus mii dušše geahččat dihkiide, gárggiideapmái ja nuoskkideapmái, eatge árvvoštala dávdaváraid ja leavvama, čilge Wilhelmsen.

Ávžžuha ráđđehusa goazastit

Ollu vuonain ja jogain lea luossa ja mearradápmot dehálaš sihke kultuvrii ja áigeloktui.

– Deanočázádagas lea johkasámi kultuvra mii lea čadnon guollebivdui jogas, dát lea dehálaš oassi kulturárbbis man eat ábut manahit, dadjá Wilhelmsen.

– Jus mii háliidit bisuhit luondduluosa ja seammás galgá leat guollebiebmanealáhus boahtteáiggis, de ferte ráđđehus goazastit. Lea balánsa buot das mii lea luonddus, loahpaha Wilhelmsen preassadieđáhusas.