Vaikko lea doaivva ahte sii leat olahan moaitámušaiguin ođđa Deanosoahpamuššii, de ballá Sámedikki ráđđelahttu Inger Eline Eriksen ahte bellodatovttasbargošiehtadusat Stuoradikkis šaddet mearrideaddjin ášši meannudeamis.
Vaikko lea doaivva ahte sii leat olahan moaitámušaiguin ođđa Deanosoahpamuššii, de ballá Sámedikki ráđđelahttu Inger Eline Eriksen ahte bellodatovttasbargošiehtadusat Stuoradikkis šaddet mearrideaddjin ášši meannudeamis.
Duorastaga lei rabas gulahallan Stuorradikkis ja buot Deanočázádaga berošteaddjit, sihke searvvit, gielddat, Sámediggi ja Deanočázádaga Guolástanhálddahus, fitne cealkimin stuorradiggeáirasiidda maid sii oaivvildit dan ođđa Deanosoahpamuššii.
Maŋŋel rabas gulahallama Stuoradikkis, de lei Sámedikki ráđđelahtu Inger Eline Eriksena (Árja) bokte sierra čoahkkin Stuorradikki Energiija- ja biraslávdegottiin.
Imaštalle meaddima
Eriksen muitala ahte sierra čoahkkimis beasai sihke son ja lávdegoddi eambbo rahpasit čilget ja jearrat gažaldagaid, ja sus lea buorre doaivva maŋŋel čoahkkima.
– Lávdegoddi heaŋgasii dasa go Sámediggi ja Deanočázádaga Guolástanhálddahusa eai leat beassan searvat šiehtadallamii, ja ledje veaháš hirpmahuvvan dasa. Norggas lea ain dađi bahábut buohkat eai dieđe nu ollu sámiid sierra vuoigatvuođaid birra, muhto go lea ná čielga áššemeannudanmeaddin dahkkon, de orro áddemin dan hui bures, muitala Eriksen.
Bellodatovttasbarggut mearridit
Eriksen goitge ii leat nu sihkar movt manná áššiin, go Stuoradikkis dávjá eai leat áššit mat mearridit bohtosiid, muhto bellodatovttasbarggut.
Eriksen áiguge dál ovdal geahččalit olahit ráđđehuspolitihkkariid ságaide, ja maiddái buot Stuorradikki Energiija- ja birasdepartemeantta lávdegotti miellahtuide, muitalan dihtii Sámi vuoigatvuoigatvuođaid birra.
– Nu movt juo lohken, de eai soaitte diehtit nu ollu sámi vuoigatvuođaid birra, ja ferten čilget ahte dál leat nu ollu gáržžideamit, ahte eat sáhte dohkkehit šat. Maiddái čilget ahte jus bisuhuvvo šiehtadus nu movt lea, de lea boađus ahte ferte vuolggahit ášši duopmostuoluide ja lágastit, lohká Sámediggeráđi lahttu Inger Eline Eriksen.
Nana sámi ovddasteapmi
Eriksen lei hui duhtavaš go lei dan mađe nana sámi ovddasteapmi Stuoradikki rabas čoahkkimis.
Golbma luossasearvvi, Deanočázádaga Guolástanhálddahus ja Sámediggeráđđi.
– Dat lea ovdamunni go čájeha man dehálaš ášši dat lea, go leat vuolgán guhkes mátkái ja buohkat ledje hui buorit ákkastallat, lohká Eriksen.
Hirpmahuvvon
Sosialisttalaš Gurutbellodaga (SG) stuorradiggeáirras Heikki Holmås hirpmahuvai go gulai daid garra moaitagiid mat ovddiduvvo rabas čoahkkimis.
Son lohká maŋŋá rabas gulahallama, ahte son ii leat duhtavaš mot leat bargan Deanosoahpamušain.
– Šiehtadallanbargu mii loahpaloahpas šattai Deanosoahpamuššan, ii oro mannan nu mo Stuorradiggi lei jurddašan go bijai johtui dán barggu, erenoamážit go Deanočázádaga Guolástanhálddahus, báikegoddi ja sámi álbmot ii leat beassan oassálastit buot dáid šiehtadallančoahkkimiin. Dán ášši berre Stuorradiggi sáddet ráđđehussii ja dáhttut dan hilgut. Bealistan gal hirpmahuvven go gullen dan garra moaitámuša maid deanuleahkilaččat ovddidedje.
Eahpidišgođii kvalitehta
Boahtte maŋŋebárgga buktá Stuorradikki Energiija- ja biraslávdegoddi iežaset evttohusa Stuorradiggái.
– Stuorradiggi berre oažžut diehtovuođu mo gođđoluossadilli duođaid lea Deanočázádagas. Deanosoahpamušas ii čilgejuvvo makkár váikkuhusaid dát ođđa soahpamuš buktá. Stuorradiggi berre oažžut buot beliid vuđolaččat čilgejuvvot báikegotti perspektiivvas maid, muđui lea dat Stuorradikki áigumušaid vuostá, joatká SG Heikki Holmås.
Son lohká ulbmil soahpamušain lea sihkkarastit luossanáli boahtteáigái nu mo buohkat rabas gulahallamis háliidedje.
– Mii fertet oažžut buoret dieđuid ja bealistan eahpidišgohten makkár kvalitehta leamaš dan dieđus maid mii ovdal leat ožžon.
