-Almmuhus-
-Almmuhus-
-Almmuhus-
OĐĐASATStuoradiggi ii meannut Nussir-ášši ođđasit 

Stuoradiggi ii meannut Nussir-ášši ođđasit 

-

-

Sosialisttalaš Gurutbellodat lei háliidan ahte Stuoradiggi galgá ođđasit meannudit ruvkebázahus luoitinlobi Riehpovutnii. Stuora eanetlohku hilggui dan gáibádusa.

Sosialisttalaš Gurutbellodat (SG) lei ovddidan evttohusa ahte Stuoradiggi ferte ođđasit meannudit Nussir ruvkedoaimma luoitinlobi ja Nordic Mining luoitinlobi Førdevutnii.

Evttohus bođii das go ráđđehusa politihkalaš stivrenreaiddus Jæløya-plattforpmas cealká ođđa ráđđehus ahte sin áigodagas eai atte ođđa luoitinlobiid, ja áigot geahčadit makkár váikkuhusat livčče mearra-ruvkeduvnniid gieldimis.

 

– Ain vejolaš bissehit 

Sihke Nussir ja Nordic Mining leat ožžon luoitinlobiid merrii, Nussir ASA Riehpovutnii ja Nordic Mining Førdevutnii.

Muhto ii goabbá ge ruvkedoaibma leat vel doaibmalobi ožžon. 

SG ii hálit ahte ruvkebázahusat galget luitot merrii, ja čállet evttohusas ahte ráđđehusa cealkámuš Jæløya-plattforpmas signalisere ahte mearra-ruvkeduvnnit leat dohkketmeahttumat.

– Doaibmalohpi ii leat vel addon. Danne lea ain vejolaš bissehit ahte luossavuonat galget adnot duvdnin ruvkedoibmii, čállet SG áirasat evttohusas.

 

Gahčai

Sin evttohus «Stuoradiggi bivdá ráđđehusa ođđasit meannudit galgá go Førdevutnii ja Riehpovutnii luoitit ruvkebázahusaid» hilgojuvvui.

Stuora eanetlohku doarjjui lávdegotti evttohusa, namalassii hilgut SG evttohusa, 87 jiena 8 jiena vuostá.

Dat 8 jiena bohte Sosialisttalaš gurutbellodagas, Ruoná birasbellodagas ja Rukses bellodagas. 

-Almmuhus-