-Almmuhus-
-Almmuhus-
OĐĐASATStuoradiggi addá sierralobi báhčit goaskima

Stuoradiggi addá sierralobi báhčit goaskima

-

-

Stuoradiggi mearridii mánnodaga doarjut geahččalanortnega addit lobi báhčit gonagasgoaskima Fosensullos, mii rievtti mielde galgá leat ráfáidahtton. Luonddugáhttenlihttu vuorjašuvvá goaskinnáliid ovddas.

Evttohus galgá leat doaimmas geahččalanortnegiin Fosensullos ja osiin Romssas, gos addo sierralohpi báhčit goaskima.

 

Jotket prošeavttain

– Lea eanetlogu mearkkašupmi, ii ge almmolaš mearrádus. Mii bivdit ahte prošeakta jotkojuvvo, dadjá stuoradiggeáirras Torhild Aarbergsbotten (Olgeš).

Son sávvá ahte prošeakta sáhttá álgit jo dán geasi, ja maŋimusat boahtte jagi. Nu go geatki, albbas, guovža ja gumpe, de lea gonagasgoaskin maid ollislaččat ráfáidahtton Norggas. Geahččalanortnet, mii lea doaibman dán rádjái, lei kártema dihte vai oaidnit man ollu goaskin vahágahttá.

– Boađus čájeha ahte mii dárbbašit eanet máhtu go orru leamen stuora proseantaoassi vahágiin goaskimiid dihte, muhto lea dárbu eanet dokumentašuvdnii juste das, dieđiha Aarbergsbotten NTB:i.

Son lasiha ahte prošeavtta bokte galgá álkibut ohcamuša bokte sáhttit váldit goaskimiid mat vahágahttet, ii ge dan dihte vai doalahit nállelogu vuollin.

 

Luonddugáhttenlihttu vuorjašuvván

Namuhuvvon boazodoalloguovlluin leat goaskimat stuora váttisvuohtan, muhto Luonddugáhttenlihttu maid vuorjašuvvá go prošeavtta bokte goaridit goaskinnáli.

– Mii sávvat ahte geahččalanáigodaga čuvvot dárkilit. Mii ballat ahte gonagasnálli goariduvvo, maid mii leat lihkostuvvan gáhttet maŋŋel go leat ráfáidahtton, dadjá lihtu jođiheaddji Lars Haltbrekken NRK:i.

 

-Almmuhus-